Ni Joy F. Tumulak
Saturday, February 26, 2011
GIINGONG badlungon nga anak gipatay pasado alas 5 kagahapon sa kaadlawon sa Sityo Dita, Barangay Pulangbato, dakbayan sa Sugbo.
Amahan nga nahibawo sa maong hitabo nagpasalamat na hinuon sa killer ug nihangyo nga tabangan siya og gasto alang sa lungon.
Ang namatay human makaangkon og usa ka samad sa iyang dughan giilang mao si Jobert Lague, 28, ulitawo, napriso na sa illegal nga drugas.
Sa pasiuna nga imbestigasyon nga gihimo nila ni SPO4 Alex Dacua, PO2 Edario Manatad, PO2 Jodan Batucan ug PO2 Michael Cudaste sa Homicide Section nagbutyag nga nakit-an ang biktima nga nagdagan human madungog sa mga silingan ang usa ka boto sa armas de fuego.
Nisulod kini sa kusina sa wa pa mahuman nga balay sa iyang silingan nga si Obet Coca ug nitago sa kusina.
Ang tagbalay nakadungog na lang og inagulo sa tawo hinungdan nga nigawas.
Nakit-an ang biktima nga nagbuy-od sa kusina ug nabulit sa dugo ang dughan.
Daling nigawas sa balay ang tagbalay ug nangayo kini og panabang sa mga silingan aron dad-on sa tambalanan.
Apan sa iyang pagbalik patay na ang biktima.
Si Alberto, amahan sa biktima nga nahinabi sa sibyaanan sa radyo dyHP, niingon nga wa siya magbasol nga namatay ang iyang anak ug mas gikalipay pa niya nga nahipos na ang iyang anak.
“Hasol kaayo nang bataa. Naa tanan bisyo. Maayo ra sad na nga nahipos. Kusog mosukol nato. Makig-away pa sa mga manghod. Hangyo lang nako sa nakapusil, palitan lang niya og lungon,†matud pa sa amahan.
Si Josephine, inahan, nisaway sa aligasyon sa iyang bana.
Siya nagkanayon nga di magkasinabot ang iyang anak ug ang iyang bana kay palahubog ang iyang bana.
Nanawagan ang inahan og hustisya alang sa kamatayon sa iyang anak.
Si barangay tanod Marcelo Coca niingon nga nalambigit sa drugas ang biktima ug na-priso na gani kini tungod sa iyang bisyo.
Si Manatad niingon nga ilang gitan-aw karon nga anggulo mao ang pagkalambigit sa biktima sa illegal nga drugas diha sa ilang lugar.
Gipatik sa mantalaang SuperBalita Cebu Pebrero 27, 2011. Linkback:
https://tubagbohol.mikeligalig.com/index.php?topic=38349.0
