Ni Lesley Caminade-Vestil/EIM (Banat) Updated August 28, 2011 12:00 AM
CEBU, Philippines - Usa ka babaye ang natagak sa dagat diha sa pantalan pasado alas 4 sa hapon sa miaging adlaw sa sitio Talo-ot barangay Poblacion lungsod sa Sibonga.
Ang biktima nailhan nga si Melisa Dela Cruz, 30, molupyo sa maong lugar kinsa sumala pa sa kapolisan nakit-an sa mga tawo nga naglakaw sa maong dapit dihang kalit nga natumba ug mikirig.Una pa kini maduoli sa mga tawo nahagbong na kini sa dagat. Ang mga tawo misuway pa pagsawom aron kini pangitaon apan wala na kini igkita pa didto sa ilawom.
Gidudahang midiretso kini og katidlom sa ilawom ug naglisod sila pagpangita sa ilawom tungod kay lubog kaayo ang dagat niadtong tungura.
Sa pakighinabi sa Banat News ni SPO1 Antonio Sanchez sa Sibonga Police mibutyag kini nga wala pa sila masayod sa hinungdan sa pagkatagak ni Dela Cruz.
Atol ning pagsulat sa balita, si Sanchez miingon nga wala pay pamilya ni Dela Cruz nga mipatim-aw sa ilang buhatan apan nagpadayon ang ilang search and rescue operation diha sa dagat. (BANATNEWS)
Linkback:
https://tubagbohol.mikeligalig.com/index.php?topic=43194.0