LAING asawa ang nasakpan sa bana nga nakighilawas sa iyang kabit sud sa ilang giabangan nga balay alas 9:30 sa gabii niadtong Dominggo.
Ang eskandalo nahitabo sa kuwarto nga gipuy-an sa magtiayon didto sa Sisoy Beach, Barangay Vicente Hizon, siyudad sa Davao.
Gisikop mao si Asuncion Raut-Raut, 31, kinsa nakighilawas sa laing lalaki nga si Gabriel Espinosa, 45, minyo, truck master, nagpuyo sa St. John, Kilometro 12, Barangay Sasa, ning siyudad.
Base sa spot report sa Sasa Police Station, ang duha nasikop sa kapulisan human mireklamo ang bana nga si Aleper Raut-Raut, 41, minyo, traysikol drayber, nagpuyo sa Sisoy Beach.
Si Aleper nangayo og tabang sa kapulisan human siya gipahibalo sa iyang bayaw nga dunay kadulog nga laing lalaki ang iyang asawa.
Daling miresponde ang Mobile Patrol Number 22 nga gipangulohan ni Police Officer 1 Ortega.
Sa paghiabot nila sa gipuy-an sa magtiayong Raut-Raut, gilili sa bana ang bangag sa ilang pultahan diin misugat sa iyang panan-an ang nakighilawas ang iyang asawa.
Tungod sa kalagot sa bana, iyang gipatiran ang pultahan ug didto nakuratan ang duha nga wa nay mga sapot.
Midagan ang lalaki palayo sa balay, apan dali siyang nasikop sa mga pulis.
Gipriso karon ang duha sa selda sa Sasa Police Station samtang gipaabot nga taralon sila sa korte. (AD)
Gipatik sa mantalaang SuperBalita Davao Oktubre 09, 2012.
Linkback:
https://tubagbohol.mikeligalig.com/index.php?topic=55608.0
