GIGULGOL sa amahan ang liog sa iyang anak nga sakop sa usa ka fraternity human nisuway sa pagpatay kaniya sa ikaduhang higayon.
Sa milabayng buwan, ang amahan gidakdakan og bato sa anak samtang natulog.
Ang pagpatay gihimo sud sa ilang kusina sa ilang balay sa Pacensia Compound, Barangay Tipolo, siyudad sa Mandaue pasado alas 7 sa miaging gabii.
Ang gipatay mao si Regie Sosas, 22, gituohang rugby boy, sakop sa Alpha Kappa Rho (Akrho).
Ang biktima nakaangkon og daghang mga samad dinunggaban sa iyang kalawasan gamit ang plamingko nga iya untang ipatay sa iyang amahan apan siya ang naunhan.
Ang biktima nga samdan sa iyang kamot giila nga si Alberto Sosas, 43, way trabaho.
Sigon sa pasiuna nga impormasyon gikan ni PO3 Nirsas Baay sa Presento Dos nagbutyag nga nanghugas sa plato ang amahan sa dihang kalit lang nga niabot ang anak nga may dala nga plamingko.
Giingong gihansakan dayon sa biktima ang suspek.
Apan kay nakabantay, natapi sa iyang amahan ug natabas ang tuo niya nga kamot.
Hangtod nga nahitabo ang linayogay sa amahan ug anak ug nalabay ang plamingko.
Napunitan kini sa amahan ug dayon nidunggab sa tiyan sa iyang anak.
Bisan kon nasamdan, gitiwasan sa pagdunggab sa amahan sa makadaghan nga higayon hangtod nga natumba ang anak.
Gigunitan sa amahan ang buhok ug gipahangad ang biktima dayon iyang gigulgol ang liog sa biktima hangtod nga namatay.
Sa dihang nakita sa amahan nga wa na maglihok ang anak, nitahan kini kang SPO1 Joseph Toring sa Mambaling police nga iyang silingan.
“Wa gyud ko magmahay, Sir, nga akong napatay ang akong anak. Salbahis tong bataa. Kon di nako tiwasan, mapatay man ko,†pulong sa suspek atol sa imbestigasyon.
Dugang nasayran sa kapulisan nga niadtong milabayng Disyembre naalarma si Alberto human siya gidakdakan og bato sa iyang anak nga si Regie samtang natulog.
Gibutyag ni Baay nga nidangop sa ilang police station ang amahan human kini magpatambal sa kahadlok nga tiwasan sa iyang anak.
Gipatawag ang anak ug ang suspek ug gihusay.
Apan wa magtuo ang kapulisan nga nagdumot pa gyud diay ang anak.
Nakadawat og taho ang kapulisan nga tiggamitan og rugby ang anak ug wa na kini sa maayong pangisip.
http://www.sunstar.com.ph/cebu/anak-giihaw-sa-amahan-0Linkback:
https://tubagbohol.mikeligalig.com/index.php?topic=17979.0
Topic: Anak Giihaw sa Amahan (Read 4577 times)