Ni Christell Fatima M. Tudtud (Banat) | Updated May 5, 2015 - 12:00am
CEBU, Philippines – Lalaki nga gikang mihatod sa iyang amiga’ng babaye didto sa Sitio Kalubihan 2, Barangay Pajac, Lapu-Lapu gipatay sa wala pa hiilhi’ng kriminal kaniadto’ng Sabado sa gabii.
Si Ruelan Goylan, 45-anyos, lumolupyo sa Pajac Proper sa Barangay Pajac luwan sa iyang multicab (YFP 880) gikan nga naghatud sa usa ka Aileen diha’ng kalit lang gipusil.
Si PO3 Luisito Ernie sa Lapu-Lapu City Police Office-Homicide Section miingon nga nagsakay og motorsiklo ang tawo nga nagpusil sa biktima ug abtik kaayo kini nga misibat.
Si Goylan gidala pa unta sa Lapu-Lapu City District Hospital sa mga sakop sa Emergency Rescue Unit Foundation (ERUF) apan gideklarar sa mga doktor nga patay na sa iyang pag-abot.
Ang mga saksi igo lang miingon nga ang nagpusil ni Goylan nagsul-ob og brown nga jacket, pants unya adunay gikabiba nga sling bag.
Wala dayon ibutyag sa kapolisan kun unsa nga matang sa armas nga gigamit sa kriminal sa pagpusil sa biktima.
Hinuon nasuta nga usa ka pistola ang mao nga armas kay nakapunit ang kapolisan og duha ka kabhang sa bala sa dapit nga nahitaboan sa krimen.
Pakighinabian pa sa kapolisan ang usa ka Aileen nga maoy gihatod sa biktima didto sa mao nga dapit sa wala pa kini pusila. Sa pagkanaog ni Aileen gikan sa multicab ni Goylan, kalit lang nga may mipusil sa biktima nga didto manukad sa ngitngit nga bahin ug nakit-an na lang si Goylan nga nagkadugo.
Ang biktima nakaangkon og samad pinusilan sa iyang wala nga bahin sa liog ug sa iyang aping nga maoy nakaingon sa iyang pagkamatay.
Susihon usab sa kapolisan ang mga messages sa cellphone nga nakit-an sa multicab. Ang pitaka sa biktima nga adunay kuwarta wala kuhaa sa kriminal. – /RUB) (BANAT NEWS)
Linkback:
https://tubagbohol.mikeligalig.com/index.php?topic=79909.0
