Tuesday, March 15, 2011
TULO ka mga ginang ang nasikop sa kapulisan human nasakpan sila sa akto nga nag-pot session ala 1:10 ang takna sa kaadlawon kagahapon didto sa Barangay 76-A Bucana, siyudad sa Davao.
Nasikop mao sila Norma Armulani, 39, nagpuyo sa Jacinto Extension; Feminie Delman, 39; ug Maria Theresa Gamboa, 37, pulos nagpuyo sa Barangay 76-A Bucana, ning siyudad.
Ang blotter sa Sta. Ana Police Station nagbutyag nga mga suspetsado nasakpan sa akto sa usa ka Abdul Mahamud nga nagsuyop og shabu sa balay ni Armulani.
Ang maong panghitabo gipahibalo sab dayon ngadto sa kapulisan nga nagpatrolya niadtong orasa mao nga gisikop sila Armulani, Delman ug Gamboa.
Paghiabot sa kapulisan sa dapit diin sila nag-pot session, malipayon pa ang mga suspek nga nagsuyop sa aso sa shabu mao nga giposasan sila.
Nakuha sa kapulisan ang mga aluminum foil, lighter, gunting ug duha ka pakiteng shabu nga maoy ebidensiya sa kapulisan sa pagpasaka nila og kaso batok sa tulo.
Kasong paglapas sa Republic Act 9165 kun Comprehensive Dangerous Drugs Act of 2002 ang giandam sa kapulisan aron ilang ipasaka ngadto sa City Prosecutor's Office (CPO). (Alger Dura)
Gipatik sa mantalaang SuperBalita Davao Marso 15, 2011. Linkback:
https://tubagbohol.mikeligalig.com/index.php?topic=39026.0
