Friday, March 11, 2011
USA ka ulitawo ang namatay human gitadtad sa usa ka 'rugby boy' samtang nag-inom alas 7:00 sa gabii niadtong Huwebes didto sa Calinan Park, Barangay Calinan Proper, siyudad sa Davao.
Ang biktima mao si John Carlo Pabelonia, 20, nagpuyo sa Purok 14, Kabisig Road, Calinan samtang ang suspetsado nailhan lamang sa pangalan nga Makoy, sakop sa Respetado Gang.
Basi sa spot report ni Senior Police Officer 1 Orlando Madrazo sa Calinan Police Station, sa wa pa mahitabo ang pagpanigbas malipayon kaayong nakig-inom ang biktima sa iyang mga higala nga sila Julius Dumagan ug Rey Anthony Ayog, pulos nagpuyo sa Calinan.
Nasayran nga samtang nagtagay ang biktima ug mga higala, kalit miabot ang suspek nga nagbitbit og hait nga sundang dayong giatake ang biktima.
Ang malipayon nga panag-inom sa managhigala nahunong sanglit nagkagubot ang ilang nahimutangan dihang gihapsan og hait nga sundang sa suspek ang biktima.
Pabelonia nakaangkon og mga samad sa iyang kalawasan mao nga dali siyang gidala sa iyang mga higala didto sa Isaac Robillo Hospital, apan tungod kay grabe ang iyang mga samad nga naangkon gideklara siyang patay na dihang miabot sa tambalanan.
Ang patay nga lawas sa biktima atua gihaya sa Angel Funeral Homes samtang ang suspek padayon nga gipangita sa mga sakop sa Calinan Police Station.
Sa pagsuwat ning balita, padayon pang gisusi ang motibo sa suspek sa pagpatay kang Pabelonia. (Alger Dura)
Gipatik sa mantalaang SuperBalita Davao Marso 12, 2011. Linkback:
https://tubagbohol.mikeligalig.com/index.php?topic=38880.0
