Ni Jonathan F. Tumulak
Sunday, April 3, 2011
KINSAY sad-an sa aksidente sa volleyball court, ang player o ginikanan?
Usa ka 3-anyos nga bata ang namatay human madat-ugi sa lubot sa iyang silingan nga nagduwa og volleyball sa Purok 8, Barangay Camputhaw, siyudad sa Sugbo, pasado alas 4:00 niadtong Sabado sa hapon.
Ang biktima mao si Jenniel Zubiri, 3, ug molupyo sa maong lugar.
Ang gitumbok nga nakadat-og sa bata ug nitahan dayon sa iyang kaugalingon sa kapulisan mao si Renante Taborada, 19, usa ka estambay nga nagpuyo usab sa samang dapit.
Sa pasiunang imbestigasyon nila ni SPO4 Alex Dacua, PO2 Edario Manatad, PO2 Jodan Batocan ug PO2 Michael Cudaste sa Homicide Section, nagbutyag nga nagduwa og volleyball ang suspek uban sa iyang mga higala nga sila si Oliver Lauron, Ruben Misa ug Peter Sinanggote.
Ang biktima niuban sa laing mga bata nga silingan ug niduol sa lugar nga giduwaan og volleyball.
Sa nagkainit na sa duwa, si Taborada nagtutok sa pagsawo sa bola ug wa na kini makabantay sa bata nga diha sulod sa volleyball court.
Dugang sa imbestigasyon, nayak-an ni Taborada ang ulo sa bata dungan sa pagkalamba ngadto sa sementadong korte.
Nakuyapan ang maong bata tungod sa kakusog sa pagbunal sa semento ug gidali kini pagdala sa Vicente Sotto Medical Center apan gideklarar sa mga doktor nga dead on arrival (DOA).
Si Taborada human sa maong hitabo, nitahan sa mga barangay tanod sa Camputhaw ug nitugyan kaniya ngadto sa kapulisan.
Daku ang pagtuo sa kapolisan nga tungod sa kakusog sa pagkabunal sa ulo sa bata, mao kini hinungdan sa iyang kamatayon.
Nasayran nga ingon niini nga edad sa bata wa pay buot ug kinahanglan gyud nga ubos sa paggiya sa mga ginikanan o guardian labi na kon mogawas sa balay.
Gipatik sa mantalaang SuperBalita Cebu Abril 04, 2011.
Linkback:
https://tubagbohol.mikeligalig.com/index.php?topic=39789.0
