Nila ni Lesley Caminade-vestil ug Darrel Carumba (Banat) Updated April 09, 2011 12:00 AM
CEBU, Philippines - Wala mosalir sa iyang asawa ang usa ka polis human kini gipadakop lakip na ang giingong iyang kabit dihang gironda sa asawa ang ilang salag diha sa panimalay sa inahan sa maong polis pasado alas-5 sa kaadlawon kagahapon.
Ang maong polis (pangalan gipugngan sa Banat News tungod sa ilang mga anak) nga nadestino sa Argao gisikop kini sa kapolisan sa lungsod sa Sibonga human ang asawa niini nanawag ug nangayo og tabang ngadto kanila.
Giingong ang balay sa inahan sa maong polis diin niya dad-a ang babaye usa ra ka balay ang gintang gikan sa ilang pinuy-anan maong nakit-an sa asawa ang pagdala niini og babaye.
Matud pa ni SPO4 Rodelito Carillo sa Sibonga Police, nga nahinabi sa Banat News nga human madawat ang maong sumbong sa asawa wala maglangay ang ilang kapolisan ug daling miadto sa lugar.
Tuod man, sa dihang gisusi sa kapolisan ang balay sa inahan sa maong polis naabtan nilang nagtupad paghigda ang duha. Ang babaye nga giingong nagpangidaron og kapin sa 30-anyos nga taga Argao.
Sa pakighinabi sa Banat News sa magulang sa gidakop nga polis usa usab ka polis sa lungsod sa Argao mibutyag kini nga base sa iyang nasayran daw sa miaging tuig pa nagsugod ang relasyon sa iyang manghod ug ang maong babaye.
Matud pa niini nga makadaghang higayon na niyang gibadlong ang manghod kabahin sa pamamaye niini apan wala kini mopatuo kaniya.
“Ako bitaw nang gibadlong akong manghod, unsaon man wala man maminaw nako,†pasabot pa sa magulang nga polis.
Samtang sa pakighinabi sa Banat News sa hepe sa Argao Police Station, nga si Senior Inspector Wilbert Parilla kini mibutyag nga pipila lang usab ka adlaw ang maong polis talagsa nalang mo-duty ug kanunay lang kini nga mo-absent.
Hinungdan nga nakadesider kini nga ilang gipa-ubos sa imbestigasyon ug posibleng ila kining pasakaan og administrative case tungod sa pag-AWOL (absence without leave).
Matud pa ni Parilla nga kaniadto dili pa kaayo grabe ang pagpunay og absent sa maong polis apan nagkadugay kanunay na kini dili mosulod. Dugang pang Parilla dunay mga higayon nga mananghid kini kay dunay paliton apan dili na kini mobalik sa estasyonan.
Samtang mibutyag usab si Parilla, nga ang mga explanation sa maong polis kalabot sa iyang pag-absent ‘unreasonable’ ug dili usab siya “acceptable†susama nalang nga nadugay siya og mata ug wala na siyay masakyan nga sakyanan padulong sa estasyonan.
Midugang usab si Parilla nga kagahapong adlawa gipaubos sa drug testing ang maong polis human ang asawa niini misumbong nga tiggamitan kini og ginadiling drugas.
Samtang ang kasamtangan nga hepe sa kapolisan sa lalawigan sa Sugbo Sr. Supt. Patrocinio Comendador sa iyang bahin mibutyag nga ila una nga ipaubos sa imbestigasyon ang maong polis.
Apan kun ugaling mapamatud-an nga nakalapas kini sa mga alegasyon batok kaniya posibleng mag-atubang kini og kasong administratiba ug kasong kriminal labot sa RA 9262 o Violation Against Women and Children. (EIM) (BANATNEWS)
Linkback: https://tubagbohol.mikeligalig.com/index.php?topic=39940.0
