MikeLigalig.com

By Lesley Caminade-Vestil/WC (Banat) Updated May 01, 2011 12:00 AM


CEBU, Philippines - Nasalbar sa kapolisan ang duha ka babaye gikan sa pagsayaw nga hubo sulod sa usa ka bar sa syudad sa Toledo nga gironda sa mga otoridad niadtong Biyernes sa kaadawon.

Ang nasalbar mao ang 14-anyos nga dalagita ug ang dalagang 21 anyos.

Samtang nasikop usab sa kapolisan ang giingong recruiter ug manager sa bar nga sila si Josephine Abadiano ug Marites Suico Cortes.

Sa pakighinabi sa Banat News, si Toledo Deputy Chief Rully Lauron, mibutyag nga sa Golden Lips Disco Bar may mga babayeng manayaw nga way hapin sa lawas ug makita ang tanang kurbada sa lawas ilabi na ang mga mahinungdanong bahin niini.

Busa milusad dayon sila og usa ka semana nga pagpaniid   sa maong balay kalingawan ug didto nasakpan gyud nila sa akto ang upat ka mga babayeng nangandam na kay mosayaw nga magpabuyangyang lang sa ilang lawas.

Apan gumikan sa kaabtik sa laing duha kinsa mikabad og panagan pag-abot sa kapolisan, duha ray nadakpan sa mga polis.

Samtang si PO2 Ronald Canio, sakop sa miresponding team, mibutyag sa Banat News nga si Abadiano mao gayuy gitudlo sa menor de edad nga maoy mi-recruit kaniya aron himoong “nude dancer.”

Matod pa ni Canio, nga atol sa ilang surveillance ilang nasayran nga kasagaran sa mga kustomer sa maong bar , mga babaye nga nagpaabot nga puniton sa mga langyaw nga lalaki.

Midugang usab si Canio nga adunay upat hangtod lima ka bar nga ila karong gipanid-an human nila madawat ang impormasyon nga nagpasayaw usab kini og mga lami kaayo og lawas nga mga babaye. Gibutyag usab ni Canio nga kasong “human trafficking” maoy gisang-at batok kanila ni Abadiano ug Cortes, samtang gisuta pa nila kinsa gyuy tag-iya sa maong balay kalingawan. (BANATNEWS)



Linkback: https://tubagbohol.mikeligalig.com/index.php?topic=40455.0