Ni Dennes R. Tabar
Saturday, June 30, 2012
CEBU CITY -- Dos anyos nga anak sa usa ka rookie nga pulis namatay human nalumos sa usa ka balde nga tubig sa lungsod sa Consolacion, Sugbo.
Nahitabo kini sa sitio Bagakay, Barangay Upper Tayud, Consolacion niadtong Biyernes sa buntag.
Nalumos sa usa ka baldeng tubig sulod sa ilang banyo ang dos anyos nga batang lalake nga si Lee Angelo Coritana, kinamanghurang anak nila ni Mayflor ug PO1 Joel Coritana.
Ang bata napalgan sa iyang apuhan nga si Lourdes Judaya nga nahumol na ang ulo sulod sa itom nga drum sa tubig.
Si PO1 Melanio Gabaya sa Consolacion police nga nahinabi sa Sun.Star Cebu niingon nga ang biktima nakigduwa sa iyang maguwang nga lalake sa wa pa ang aksidente.
Ang duha gibilin sa ilang mga ginikanan ngadto sa ilang apohan nga babaye, kinsa nangutaw niadtong higayuna.
Si Diosdado Nonongan Jr., tanod nga maoy nitabang sa apuhan sa pagdala sa bata ngadto sa Eversley Child Sanitarium Hospital pinaagi sa ilang patrol car sa barangay, niingon nga gideklarar nga dead on arrival ang bata.
Matod ni Nonongan nga pasado alas 9 sa buntag niadtong Biyernes nadungog niya ang iyang mga silingan nga nangayo og tabang.
Dali siyang miadto sa balay sa iyang silingan ug mao na lang iyang nakita nga niburot na ang tiyan sa bata.
Nagdumili sa paghatag og pamahayag ang mga ginikanan sa bata kalabot sa hitabo.
Nasayran nga ang upat ka mga anak sa magtiayon giatiman sa ilang apuhan tungod kay ang ilang inahan anaa nagtrabaho sa MEPZ samtang ang ilahang amahan usa pa ka field training police (FTP) sa Regional Mobile Group sa lungsod sa Moalboal.
Matod ni Nonongan nga wa makabantay ang apuhan nga niadto sa banyo ang bata nga nagdala og tualya nga gihumol niini sa tubig.
“Nahulog ang labakara sud sa drum. Gikab-ot unta sa bata. Uya mas bug-at baya ang sa taas nga lawas kay sa ubos, wa ka balanse maong natuwad siguro, nya wa nabantayi,†nagkanayon si Nonongan.
“Daghan man gud na buhaton ang lola atong tayma. Nalinga siguro,†dugang niya.
Ang bata gikatakdang ilubong karong Martes, dugang taho sa Sun.Star Cebu. (Sun.Star SuperBalita Cebu)
Linkback:
https://tubagbohol.mikeligalig.com/index.php?topic=52022.0