Ni Guam P. Logroño
Saturday, May 7, 2011
USA ka 11-anyos nga batang babaye gilugos sa iyang ama-ama ug ang iyang inahan gidunggab sa suspek nga katipon kagahapon sa alas 4:00 sa kaadlawon sud sa ilang panimalay sa Barangay Cansumoroy , lungsod sa Balamban.
Si Alecia (di tinuod ngan), 47, samdan sa nagkadaiyang parte sa lawas apan ang iyang 11-anyos nga anak babaye ug Grade 4 ang nalugos sa iyang kaipon nga si Rommel Climaco, 32, drayber sa traysikad, ug lumad nga taga dakbayan sa Toledo.
Si PO2 Cristobal Geronimo sa Homicide Section sa Cebu City Police Office (CCPO) nagkanayon nga usa ka driver sa v-hire nga si Hermano Baron, 44, minyo taga Barangay Nangka, Balamban nitaho diha sa ilang buhatan mga alas 8:00 kagahapon sa buntag.
Si Baron nipahibalo nga ang inahan ug anak iyang naagian sa Trans Central Highway samtang padung siya sa dakbayan sa Sugbo hinungdan nga iyang gihunongan dihang nakit-an niining nagkadugo.
Gusto untang ihatod sa tambalanan sa Balamban ang mga biktima apan nagdumili ang inahan sa kahadlok hinungdan nga dinhi sa dakbayan sa Sugbo gidala ug gisud sa Vicente Sotto Memorial Medical Center (VSMMC).
Matud niya nga ang inahan nitug-an nga niadtong Biyernes sa gabii, nagpaabot siya sa iyang kapuyo nga mopauli sa ilang panimalay apan dihang naabot kini hubog ug gihulagway niini nga ‘sabog.’
Mao kini hinungdan nga nagkakonprontasi ang duha nga nisangko sa problema sa ilang pagpuyo sa ilang pamilya, diin nahitabong gikulata siya niini.
Wala pa matagbaw sa pagkulata ang suspek kalit lang kining nibunot sa usa ka mahait nga hinagiban gidunggab makadaghang higayon ang biktima sa nagkadaiyang parte sa lawas.
Hinuon, nakapanalipod ang biktima hinungdan nga wala ma-intimano sa dihang gidunggab sa suspek ug ang mga bukton niini nasamad sa iyang pagpanagang.
Ang suspek nipadayag nga mogawas lang siya didto sa balay aron ma-uli-an ang iyang kalagot niini dihang didto sa sulod sa panimalay ang suspek gilugos niini ang 11 anyos.
Human niyag lugos, gitawag usab niini ang inahan nga nagkadugo ug gipasulod sa ilang panimalay dayon nangatulog sila uban sa iyang anak.
Dihang nahinanok sa pagkatulog ang suspek dali silang nangikyas sa iyang anak nga nagdagan sa Trans Central Highway may na lang kay nagian sa driver nga si Baron ug gitabangan.
Ang inahan nidugang nga kapin sa tuig na silang nagtipon sa suspek ug ang 11-anyos nga anak babaye gilugos na niini, apan di lang sila makasulti tungod kay nahadlok silang patyon.
Ang maong kaso giduso na sa Homicide Section sa CCPO ngadto sa Balamban police diin didto nahitabo ang krimen ug gipangita na ang suspek.
Gipatik sa mantalaang SuperBalita Cebu Mayo 08, 2011. Linkback:
https://tubagbohol.mikeligalig.com/index.php?topic=40579.0