Oro: Australian gitulis, gigapos (2:21 p.m.)
By Joey P. Nacalaban
CAGAYAN DE ORO -- Gitabunan ug gigapos sulod sa sakyanan ang usa ka Australian national human gihimulbolan sa mga tulisan niadtong niaging adlaw.
Si SPO1 Mario Pelaez, sa Anti-Theft and Robbery Section (ATRS) niila sa biktima nga mao si Louis Rowe, 51, minyo ug nagpuyo sa Xavier Estates, Upper Carmen ning dakbayan sa Cagayan de Oro.
Sumala sa taho nga sa wala pa nahitabo ang pagpanulis dunay gikasabot si Rowe nga nag-deal og mga gold bars nga naila lang sa pangalan nga Pedring, taga Xavier Heights ug usa ka mekaniko.
Giingong nagkasabot si Rowe ug Pedring nga magbaligya og gold bars sa kantidad nga dos milyones hinungdan nga nagka-uyon sila nga magkita sa SM City niadtong adlawng Martes.
Apan pag-abot sa biktima sa maong establisimento samtang diha pa siya sa iyang sakyanan gitagbo siya ni Pedring ug gipangutana kong dala niya ang kuwarta.
Dihang nitubag si Rowe og 'yes' giingong nananghid dayon si Pedring nga molakaw kay iyang adtuon ang iyang kauban nga naa sulod sa SM City.
Pipila lang ka segundo kalit niabot ang wala mailang duha ka mga lalaki kinsa pulos nga armado ug nisakay sa sakyanan sa biktima dayon usa niini ang nition kaniya. Samtang ang laing usa nituklo sa biktima ginamit ang cord ug nipuli pagmaneho.
Wala gyuy nakamatikod sa maong hitabo bisan sa kadaghan sa tawo sa palibot gani duna pay mga tinugyanan sa trapiko niadtong higayona. (Sun.Star SuperBalita Cagayan de Oro)
Linkback:
https://tubagbohol.mikeligalig.com/index.php?topic=12123.0