MikeLigalig.com

Ni KRIS C. SIALANA


TABAS ang liog nga bahin sa usa ka ulitawo human gi-samurai sa kaugalingon nga uyoan niadtong Lunes mga alas 10:45 sa gabii sa Igpit, Opol, Misamis Oriental.

Samad sa liog ang naangkon sa biktima nga nailang si Jhon Michael Telerong, 32, ulitawo nga lumulupyo sa nahisgutang dapit.

Sa nahipos nga impormasiyon gikan sa Northern Mindanao Medical Center (NMMC) ning dakbayan sa Cagayan de Oro diin gidala ang biktima nasayran nga kaugalingong uyoan ra gihapon ang responsable sa pagpanigbas kinsa nailang si Melvin Cania, 50-anyos, ngadto na kay Telerong.

Gikabutyag sa naghatod nga si Ponciano Castro nga pulos lango sa ilimnong makahubog ang duruha.

Giingong nagkalalis kini sa wala ikabutyag nga rason gumikan na usab sa ilang kahubog ug miresulta sa maong pagpanigbas.

Sa pagsulat niini nga balita ang maong biktima ang pabilin pa nga nagpaalim sa NMMC ning dakbayan.


Gipatik sa mantalaang Superbalita Cagayan de Oro Abril 06, 2016.