MikeLigalig.com

LAAK, Compostela Valley -- Usa ka dalaga ang namatay human nagsabot nga magpakamatay uban sa laing usa ka babaye didto sa Purok 7, Poblacion, alas 6:30 sa buntag, Miyerkules.

Ang namatay giila sa kapulisan nga mao si Lanie Ongao Baquino, 17, dalaga, ug residente sa Purok 2, Poblacion, Laak.

Segun sa imbestigasyon sa Laak Municipal Police Station, nasayran nga ang biktima kauban sa iyang higala nga si alyas Jean, 16, saleslady ug residente sa Purok 10, Barangay Mabuhay sa maong lungsod, nagkasinabot nga magpakamatay sa wala pa matinong rason.

Gamit ang twine nga gihigot sa liog, nagpakamatay ang biktima sa punoan sa narra, apan giingong wala makaako sa paghunos sa kinabuhi si alyas Jean.

Ang patay'ng lawas sa biktima gihaya karon sa ilang panimalay.

Giimbestigahan na sa Laak Municipal Police Station kon aduna bay foul play sa insidente ug sayron sab ang tinuod nga hinungdan sa ilang pagpakamatay. (RSC)


Gipatik sa mantalaang SuperBalita Davao Agosto 28, 2015.