MikeLigalig.com

Ni Jojo C. Ugdol/EIM (Banat) | Updated May 26, 2014 - 12:00am


CEBU, Philippines - Pipila ka adlaw human mibulag sa iyang gang, usa ka lalaki ang gipusil patay kagahapon sa kaadlawon diha sa Barangay Inayawan ning dakbayan sa Sugbo.

Ang biktima giila nga si Ivan Vincent Baguio, lumad nga taga Barangay Suba-Pasil ning siyudad.

Ang uyab sa biktima nga si Grace Castañares, 18, mitug-an sa kapulisan nga samtang nangatulog sila kauban sa biktima sa iyang panimalay dihang iyang nabantayan nga wala na sa iyang tapad ang biktima.

Dali niya nga gipangita si Baguio maong migawas siya sa balay  ug iyang nakita nga duna kini kaestorya nga duha ka lalaki sa ngitngit nga bahin ug gumikan sa kahadlok, dali siya nga mibalik sa sulod sa balay.

Sunod niya nga nadunggan ang sipa nga sunod-sunod nga buto sa armas ug sa iyang paggawas iyang nakita nga naligo na sa dugo si Baguio ug wala na diha ang mga lalaking kaestorya niini.

Matud pa ni SPO1 Ruth Violango, ang imbestigador sa Homicide Section bag-ohay lang mibuwag sa Crips gang ang biktima ug sukad niadto permi na kining makadawat og hulga nga patyon sa iyang mga kauban. (BANAT NEWS)