MikeLigalig.com

SuperBalita Davao
Wednesday, October 9, 2013


USA ka lalaki ang nasikop sa kapulisan human namusil sa iyang kaduwa og bilyar human mapildi alas 8:00 sa buntag, Martes.

Ang insidente nahitabo didto sa NHA Relocation, Bangkal, siyudad sa Davao.

Ang Talomo police nag-ila sa biktima nga si Jerson Silong Morales, 18, ulitawo, drayber, residente sa Diwata Street, Central Park, Bangkal samtang ang suspek mao si John Dave Codiban Lucena, alyas Dodong, 18, drayber, ug molupyo sa Block 25, Lot 30, NHA Relocation, Bangkal.

Subay sa imbestigasyon sa Talomo police, nasayran nga nagduwa og bilyar sila Morales ug Lucena.

Dihang napildi si Lucena, iyang gidala ang biktima sa balay sa usa ka Eugene kinsa igsuon niya duol sa tulay sa Bangkal sakay sa usa ka open cab nga motor nga gimaneho ni Luigi Trazo Seno.

Pag-abot nila sa lugar, gipanaug ang biktima ug gipahulat.

Dihang mibalik ang suspek, duna na kini dalang .38 revolver ug gipusil ang biktima usa ka higayon sa tuhod apan milahos ang bala sa tiyan sa biktima.

Human sa hitabo, daling misibat ang suspek samtang ang biktima daling gidala sa Southern Philippine Medical Center diin naa karon sa talandugon nga kahimtang.

Sa gipahigayon nga hot pursuit operation sa kapulisan, nasikop dayon ang suspek kinsa nakuhaan og .38 nga revolver nga dunay upat ka mga buhing bala.

Gihikay na ang posibleng kaso nga kaso batok sa suspek ngadto sa korte. (Jeepy P. Compio)

Pastilan pud ning sore loser type ba. Tungod sa garbo kutkoton ang kasingkasing sa kaligutgot. Angkona na lang gud ang imong kaparotan.