MikeLigalig.com

SuperBalita Cagayan de Oro
Monday, July 15, 2013


NAGPABILING gipangita sa rescue team ang 23 anyos nga lalaki nga miambak sa tulay niadtong buntag sa Domingo sa Ysalina Bridge, siyudad sa Cagayan de Oro.

Giila ang biktima nga mao si Dave Roland Lacerna, lumad nga taga Dasmariñas, Manila kinsa kalit miambak sa tulay human nagbikil sa kapuyo niini.

Gisaysay sa kapuyo sa biktima nga mao si Roselyn Diango nga sa wala pa miambak sa tulay ang iyang kaipon, nagkabikil sila tungod kay iyang gihatagan og kwarta ang usa ka hubog nga lalaki sulod sa usa ka videokihan.

Gusto sa maong lalaki nga mokanta apan gikaon ang P5 niini sa makina.

Boluntaryong gihatag ni Roselyn sa iyang kwarta aron makakanta ang maong lalaki nga gikalagot pag-ayo ni Lacerna. Samtang nagbaklay sa maong dalan, nagsige og lalis ang duha apan mao na lamang ang gikakurat niini dihang kusog nga labugsaw sa tubig ang nadungog.

Gani nagpatabang pa ang maong lalaki, misyagit nga nangayo og tabang.

Ang kapolisan sa Police Station 1 (PS1) sa Divisoria niingon nga kung desidido nga mosuway kini sa paghikog, dili na kini magsiyagit og mangayo pa og tabang. Apan gituohang nahadlok kini sa kusog nga bul-og sa tubig posibleng hinungdan sa pagsiyagit.

Gihimo ang sunod-sunod nga rescue operation sa maong dapit apan wala gyod makita ang biktima hangtod sa pagsulat ning balita.

Nanawagan si Roselyn sa makakita niini nga nagsul-ob iyang kapuyo og kolor mint green nga T-shirt og kolor itom nga short pants ug itaho kini sa kapolisan sa PS1 sa Divisoria. (SVB)