MikeLigalig.com

Ni Lesley Caminade-Vestil/EIM (Banat) Updated September 09, 2012 12:00 AM


CEBU, Philippines - Maayong pagkabuslot sa ulo sa gituohang may deperensya sa pangisip human kini gipusil pasado ala-una sa kaadlawon diha sa sitio Colo sa barangay Inayawan dakbayan sa Sugbo.

Ang biktima nailhan nga si Romel Romero, 35, molupyo sa maong lugar ug gihulagway nga adunay sakit sa pangisip.

Sa pasiunang imbestigasyon sa kapolisan nasayran gikan sa igsuon niining si Eda nga mao na lay iyang nakita ang iyang igsuon nga naglunang sa kaugalingong dugo nga naghapla sa tugkaran sa ilang panimalay.

Matud pa ni Eda ngadto sa mga imbestigador nga ang ilang silingan maoy mipukaw kaniya ug mipahibalo nga ang iyang igsuon gipusil.

Sa inisyal nga imbestigasyon nasayran sa kapolisan nga sa wala pa mapalgi ang biktima gikatahong nakit-an kining nagbaklay dihang kalit lang nga adunay lalaking mibutho ug mipusil sa ulo niini. Ang biktima naigo sa likod nga bahin sa iyang ulo ug wala na madala pa sa tambalanan human kini nakabsan sa iyang kinabuhi.

Sa pakighinabi sa Banat News ni PO3 Lou Pagara sa Homicide Section sa Cebu City Police Office (CCPO) mibutyag kini nga ang igsuon sa biktima mitug-an kanila nga may deperensya sa pangisip ang biktima.

Gisusi karon sa imbestigasyon ang posibilidad nga naalaan lang ang biktima tungod maglibud-suroy kini ug dunay higayon nga kalit kining manguros ug motagotago. (BANAT NEWS)