MikeLigalig.com

Ni Sheila C. Gravinez
Tuesday, August 14, 2012


GIIMBESTIGAHAN na karon sa buhatan ni Bise Gobernador Agnes Magpale ang giingong kaso sa prostitusyon sud sa Cebu Provincial Detention and Rehabilitation Center subay sa reklamo sa usa ka babaye nga taga General Santos City.

Sa suwat nga gipadala sa bise gobernador ngadto kang Atty. Jose Ma. Gastardo, Capitol consultant on jail matters, iyang gisaysay nga si Maria (di tinuod pangan) nireklamo nga biktima siya sa trafficking.

Ang babaye nga anaa na sa 30 kapin ang pangidaron personal nga nida­ngop sa buhatan ni Magpale sa miaging hapon inubanan sa usa ka reporter sa Bombo Radyo Cebu.

Sigon pa sa saysay niini, gipasaligan siya sa usa ka recruiter nga hatagan siya og desente nga trabaho inig abot niya dinhi sa Sugbo gikan sa Mindanao.

Apan niadtong Biyer­nes didto siya gidala sa CPDRC sa maong recrui­ter ug giingong gihimong prostitute sa mga piniriso.

Dugang pa, nakasud siya sa maong bilanggoan tungod kay gihatagan siya og conjugal ID ug gipaila nga live-in partner sa usa sa mga piniriso.

“What makes her ordeal alarming to us in the provincial government...the recruiter gave her easy access to the CPDRC, allegedly as a live-in partner...In fact, she was issued a CPDRC conjugal ID,” tipik sa unod sa suwat ni Magpale ngadto kang Gastardo.

Sa habig ni Gobernador Gwen Garcia, gipaneguro niini nga imbestigahon ang maong pasangil.

“As I’ve already said, we are not running a kindergarten school here. Mga inmates na ang atong gisulod niana, accussed of different crimes,” matod sa gobernador sa buwag nga interview sa mga tigbalita sa Kapitolyo kagahapon.

Matod niya kon dunay makit-an nga nagpasagad sa katungdanan ila kini nga patubagon.

“We will deal with them accordingly. You have seen my swift action on previous occasions. Of course, we don’t also investigate by publicity calling for a press conference,” dugang ni Garcia.

Gisaway niya ang bise gobernador nga nagpatawag pa og media aron ibutyag ang maong pa­sangil nga prostittusyon sud sa CPDRC.

“Although this is the first time hinuon nga iyang gihimo because in the past, she was always matawag nato discreet especially in matters that already involve people’s reputation,” pahayag sa gobernador.

Sa pagkakaron, giklaro na sa mga abugado sa Office of the Vice Governor ang maong kaso samtang si Maria anaa na sa kustodiya sa International Justice Mission.

Gipatik sa mantalaang SuperBalita Cebu Agosto 15, 2012.

     


     


              Gikan ni sa ako step daughter, pwerte jud nako kinatawa! hahahahahha

Baratohon diay, pang garage sale...