MikeLigalig.com

Tuesday, March 8, 2011


USA ka sais anyos nga batang babaye ang gidala sa iyang inahan sa tambalanan aron ipahiling kung dunay kamatuoran nga giamung-amongan ang iyang anak sa ilang silingan niadtong Lunes.

Base sa blotter sa Southern Philippines Medical Center (SPMC), ang biktima gidala sa maong tambalanan alas 8 sa gabii pinaagi sa iyang inahan nga gitago sa pangalan nga Flor, nagpuyo sa Barangay Matina Aplaya, siyudad sa Davao.

Ang biktima gitago sa pangalan nga Quennie, 6, gidala sa iyang inahan sa tambalanan human nakabalita siya gikan sa ilang silingan nga gipahimuslan ang iyang anak.

Matud sa inahan sa biktima ngadto sa mga gwardiya sa tambalanan, nakadawat siya og impormasyon sa ilang 10 anyos nga silingan nga si Apple kinsa nagbutyag nga makadaghan na nga higayon nga gipahimuslan ang biktima sa ilang silingan nga si alyas Ogag Algabre, 18.

Human niya nasayran ang maong balita, buot niyang masayran kung tinuod ang mga tabi pinaagi sa pagpahiling sa iyang anak sa mga doktor.

Kung mapamatud-an nga gihilabtan ang bata, manubag gayud ang gitudlo nga suspek pinaagi sa pagtaral kaniya ngadto sa korte.

Ang Superbalita naningkamot nga makakuha og dugang impormasyon bahin sa resulta, apan way nakuha nga impormasyon gikan sa tambalanan ug kapulisan. (AD)


Gipatik sa mantalaang SuperBalita Davao Marso 09, 2011.

Angayan na gyud nga ibalik ang death penalty. Ang mga rapist nagkaanam ug kabata. Diha pud toy balita nga 13 or 16 ba to nga nanglugos na.