Ni Sheila C. Gravinez
Tuesday, May 24, 2011
ANAK og katabang ug kanhi waiter mi-top sa certified public accountancy licensure examination nga gipahigayon di pa lang dugay sa Manila, Baguio, Cagayan de Oro, Davao, Iloilo, Legazpi ug Cebu.
Si Antonio Dandan Sanchez Jr., migradwar sa University of San Jose Recoletos (USJ-R), nahimutang sa ikaduhang puwesto sa top 10 uban sa iyang 92.00 percentage score.
Gawas niya, lain pang tulo ka mga gradwado nga pulos gikan sa University of San Carlos ang nakasulod usab sa top 10 sa licensure exam.
Nagtabla sa top four mao sila si Hegiñ JA Vellana Chua Jr., ug Viktor Xenon Oliva Lequin nga pulos nakakuha og 91.57 percentage score.
Si Gilson Ycong Pino nga gikan usab sa USC sa dakbayan sa Sugbo ang nahimutang usab sa ika-unom nga dapit nga dunay 90.71 percentage score.
Si Sanchez Jr., kansang amahan lumad nga taga Leyte apan kasamtangan nga nagpuyo karon sa Barangay Inayawan, syudad sa Sugbo wa mawagtangi og paglaom, bisan sa kalisod sa ilang kahimtang ug determinado siya nga mahaw-as sa kapobre ang ilang pamilya.
Ang iyang inahan kanhi labandera dinhi sa dakbayan ug atua karon nanarbaho sa Manila isip usa ka katabang.
Sa interview sa dyLA ni Sanchez Jr., wa siya magdahom nga masud sa top ten kay ang iyang gipangayo sa Ginuo mao lang nga makapasar sa exam.
“Nalipay kaayo ko kay wa ko mag-expect nga masud sa top 10. Mao ra gyud ang akong gi-aim nga makapasar. Salamat kaayo sa Ginuo nga naay bonusâ€, malipayong gipaambit ni Sanchez Jr.
Mi-graduate siya sa USJR niadtong Marso sa miaging tuig nga cum laude ug working student nga na-assign sa accounting department sa tunghaan samtang mi-graduate usab siya sa elementarya isip valedictorian.
Ang Professional Regulation Commission mipahibawo kagahapon nga gikan sa 5,259 ka mga examinees, 2,130 lang ang nakapasar sa CPA licensure exam.
Gipatik sa mantalaang SuperBalita Cebu Mayo 25, 2011. Linkback:
https://tubagbohol.mikeligalig.com/index.php?topic=41013.0
Topic: Anak og helper top sa CPA board (Read 1484 times)