TESDA-Bohol mitanyag
SSTP sa mga nitibo, KRs
TAGBILARAN CiTY, Bohol, October 16, (PIA)—Agi og pagduyog sa kagamhanan sa pag-amoma sa mga nitibo sa Bohol ug sa mga kanhi rebelde apan karon kuban na sa reporma, mitanyag ang Technical Education and Skills Development Authority-Bohol (TESDA Bohol) sa Special Skills Training Program (SSTP) ngadto sa nga nitibo nga Eskaya ug Badjao, ug sa mga kanhi rebelde apan mitahan na ug mibalik sa sabakan sa kagamhanan.
Mikabat sa 98 ka nitibo o Indigenous Peoples (IPs) partikular na ang mga sakop sa tribu Eskaya ug mga Badjao ug lain nga 50 ka kanhi rebelde ang gibansay sa kagamhanan pinaagi sa TESDA, sa nagkalain-lain nga mga bansay.
Tumong sa maong mga tanyag, mao ang paghatag sa mga nitibo ug sakop sa tribu sa kasaligan nga katakus nga manarbaho alang sa ilang panginabuhi-an aron dili na magsalig pa sa uban.
Ang SSTP nahasubay sa Executive Order No. 70 ug Administrative Order No. 10, nga gipagawas ni Presidente Rodrigo Duterte ug nagtumong sa pagmugna og nasudnon nga dugokan sa kalinaw samtang gimoon nga opisyal nga lakang sa kagamhanan ang whole-of-nation approach.
Kini usab napahaum sa tumong ni Presidente Duterte nga mapaundang na ang local nga armadong pagpakigpisug kay kini nakapagabok sa nagkahiusang nasud.
Matud sa TESDA pinaagi ni Bohol Provincial Director Grace Corazon Castillo, milaum sila nga ang programa maghatag og gahum sa mga sakop sa tribo ug mga kanhi rebelde nga manginabuhi na nga magkaugalingon aron usab mamenosan ang paspas nga paggamit sa kahinuhaan sa mga ancestral domains.
Ilawom sa programa, ang mga benepisaryo nga gikan sa mga nahisgutan nga pundok, makapailawom sa libre nga mga bansay-bansay sa katakus pang-panginabuhi-an, may libre nga assessment, bansay aron makapasugod og negosyo, bansay sa pagpangita og pundo kapamuhunan ug pagkuha sa mga starter kits aron makasugod sa ilang mga negosyo ug pamuhunan.
Humans a mga bansaybansay ang mga benepisaryo pakabaton na unya sa katakus sa pagproseso sa pagkaon pinaagi sa pag-asin, pagpatunhay sa pagkaon pinaagi sa pagpa-aso, paghimo og mga pan, pagluto ug pagdegamo sa mga pagkaon ug ang paghimo og cakes.
Dala sa whole of nation approach, ang mga benepisaryo sa programa nga SSTP, may mapaabut pa usab nga abag sa uban pa nga mga ahensya, sa kagamhanan nga probinsyal sa Bohol ubos sa Joint Task Force Dagohoy aron matumbok na usab ang mga panginahanglanon human matibawas ang mga bansaybansay, butyag sa TESDA.
Ang SSTP usa lamang sa mga programa sa TESDA nga nagpakayab sa iyang bandila nga “TESDA Abot Lahat.” (rahc/PIA Bohol uban ni Rosemarie Bantol)
HULAGWAY:
PASIUNA NGA PAGPASABUT. Gihimo sa usa ka tinugyanan sa technical vocational training institute ang orientation sa mga bansaybansay nga itanyag sa TESDA sa mga Eskaya didto sa Taytay Duero, ug sa mga nagkadaiyang lugar sa Bohol. (TESDA: Hulagway ni Ronald Datahan)
Book online travel tickets in Asia, Australia and New Zealand at:
https://12go.asia/?z=3467325Linkback:
https://tubagbohol.mikeligalig.com/index.php?topic=91113.0
