SUPERBALITA-DAVAO
JEEPY P. COMPIO
USA ka asawa ang gipatay sa iyang mister kinsa nagselos tungod sa pagtuong dunay laing lalaki ang iyang misis.
Ang insidente nahitabo alas 12:30 sa kaadlawon, Miyerkules, didto sa Barangay Colosas, Paquibato District.
Ang biktima mao si Neneth Ebora, 39, kinsa giayo og dunggab hangtud nga namatay sa iyang bana nga si Jose Ebora, 39, mag-uuma sa dapit.
Subay sa impormasyon nga nakalap sa Sun.Star Davao Superbalita, nasayran nga pista sa dapit niadtong Martes, dihang miuli ang asawang si Neneth sa ilang balay gikan nagtrabaho sa sentro sa siyudad.
Giingon nga dungan sa ilang kapistahan, pamalaye sab sa kamaguwangan nga anak sa biktima ug nakatakdang ihawan unta og baboy.
Sumala ni Rommy Ebora, igsuong lalaki ni Jose, nga alas 11:00 sa gabii niadtong Martes, nanumbalay si Neneth sa ilang silingan, apan giapas siya ni Jose bandang alas 12:00 sa tungang gabii kay nakasagap siya og istorya nga duna kini giingong kabit samtang nagtrabaho.
Nagdumili pa sa pag-uli ang biktima, apan giguyod kini sa bana ug nag-away taliwala sa kalsada.
Wa nasayran nga nagdala diay og kutsilyo ang bana nga giduslak sa dughan ug tiyan sa makadaghang higayon sa iyang asawa nga miresulta sa kamatayon.
Human napatay iyang asawa, nag-unay sab siya pagdunggab sa iyang tiyan mao nga gidala siya sa Southern Philippines Medical Center (SPMC) alas 5:00 sa buntag kagahapon.
Ang suspek anaa sa talandugong kahimtang sa kasamtangan.
Ang patay nga lawas sa biktima gihaya na sa ilang panimalay sa nasampit nga dapit samtang ang suspek gibantayan sa mga pulis sa SPMC.
Linkback:
https://tubagbohol.mikeligalig.com/index.php?topic=79770.0