Ni Lesley Caminade (Banat) Updated May 30, 2010 12:00 AM
CEBU, Philippines - Samdan sa nagkalainlaing bahin sa lawas ang usa ka asawa human kini lubaa sa giingong kabit nga babaye sa iyang bana, didto sa sitio Magsaysay, barangay Pasil, ning dakbayan sa Sugbo, sa miaging hapon.
Ang biktima nailhan nga si Johndy Peligrino, 27, usa ka legal nga asawa ug usa ka negosyante nga taga sitio Puntod, barangay Mambaling ning dakbayan, samtang ang suspetsado nailhan usab nga si Jandell Abellana, 19, uban sa usa ka wala hiilhing babaye, nga pulos taga Mambaling.Si PO2 Jodan Batucan sa Mambaling Police Station mibutyag sa Banat News nga niadtong Biyernes midu-aw ang biktima sa iyang bana sulod sa Bagong Buhay Rehabilitation Center (BBRC), diin kini kasamtangang gipriso sa kasong may labot sa illegal drugs.
Apan matud pa nakurat nalang ang biktima dihang nasayran niya nga ang pwede rang makaduaw sa iyang bana mao ra ang suspetsado nga giingong kabit niini.
Busa migawas ang biktima sa compound sa BBRC apan nakita niini ang suspetsado ug didto nagsugod dayon sila og lalis hangtod nga nagkabinugnoay ang duha.
Midangop sila sa Guadalupe Police Station apan gitulod sila ngadto sa barangay Pasil aron adto husaya.
Busa gituman dayon sa biktima ang tambag sa kapolisan ug pag-abot niya sa ilang balay, mipahuway og kadiyot dayon mipara og traysikad kay nagpahatod ngadto sa barangay hall sa Pasil.
Apan samtang nagdagan ang traysikol kalit lang mitumaw sa karsada ang suspetsado uban sa usa ka wala hiilhing babaye nga kuyog niini.
Diha-diha gipugngan sa suspetsado ang traysikad nga gisakyan sa biktima ug dayon gihansakan sa iyang kutsilyo ang nagkalainlaing bahin sa lawas sa biktima.
Dihang nakita sa suspetsado nga mibuhagay na ang daghang dugo sa lawas sa biktima mikaratel kini og dagan uban sa iyang kaubang babaye, samtang ang biktima daling gihatod ngadto sa Cebu Miller Hospital .
Padayon pang gipangita sa kapolisan ang suspetsado. (BANAT NEWS)
Linkback:
https://tubagbohol.mikeligalig.com/index.php?topic=45296.0