Ni Jojo C. Ugdol (Banat) | Updated July 7, 2015 - 12:00am
CEBU, Philippines – Milubong ang kutsilyo sa dughan sa usa ka lalaki human kini gihansakan sa bana sa babaye nga iyang giangkas sa gimanehong motorsiklo diha sa P. Del Rosario Extension , Barangay Sambag 1 ning dakbayan sa Sugbo pasado alas 7 sa nakalabay nga gabii.
Ang biktima naila nga si Christopher Responde, factory worker nga taga Sitio Alaska, Barangay Mambaling, samtang ang suspetsado mao si Ricardo Abestano, 27, minyo nga taga lungsod sa Badian.
Matud pa ni Police Officer 1 Christian Rollon ang desk officer sa Fuente Police Station nga nahinabi sa Banat News, selos ang ilang nakita nga motibo sa maong krimen.
Sumala pa ni Rollon, ang suspetsado daan nang nagduda nga duna’y laing lalaki ang iyang asawa ug niadtong higayona ni-text ang asawa sa suspek nga padung na kini mosakay og bus pauli sa ila human mitambong og bunyag sa lungsod sa Pinamungajan.
Apan nakita niini ang iyang misis nga nag-angkas sa motorsiklo ni Responde. Wala nakapugong ang suspetsado gihansakan niya sa dughan ang biktima ug gisumbag ang iyang asawa. Sulay pa unta nga gidala sa Cebu City Medical Center (CCMC) ang biktima apan kini nakabsan gayod sa iyang kinabuhi.
Ang asawa sa suspetsado ang gikatahong hugtanon nga mihimakak sa pasangil sa iyang bana ug igo lang daw kini gihatod sa biktima. – /EIM) (BANAT NEWS)
Linkback:
https://tubagbohol.mikeligalig.com/index.php?topic=80445.0