MikeLigalig.com

MGA pulis sa Fuente Police Station ug Mobile Patrol gipasanginlang nanguhag kuwarta nga P300,000 ug cell phone dihang gisaka ang balay sa usa ka pulis sa lalawigan aron kuhaon ang armalite nga isyu sa gobiyerno.

Apan ang pangulo sa Cebu City Police kuwang sa pagtuo nga mahimo kini sa iyang mga sakop.

Iyang gitataw nga adunay pagtugot ang ilang pagsaka sa balay.

Pasado alas 10 niadtong Miyerkules sa buntag, ang asawa ni PO3 Reynaldo Solante, sakop sa Intelligence Branch sa Cebu Provincial Police Office, nga si Christine sakay sa iyang Mitsubishi Estrada gialarma sa Mobile patrol tungod kay adunay taas nga armas nga dala.

Security guard sa usa ka kan-anan ang ni-report sa pulis sa dihang iyang nakit-an niini ang armas samtang nag-parking ang asawa sa sakyanan aron mokaon.

Sa dihang napahunong sa Fuente Police Station ug Mobile Patrol ang sakyanan wala na diha ang armalite nga sulod sa sakyanan tungod kay gibilin na sa asawa sa ilang balay. Ang armas isyu sa iyang banang pulis.

Matod ni PO3 Solante nga nikuyog gyod ang mga pulis sa iyang asawa ngadto sa ilang balay bisan pa ug wala na nila makit-i ang armas.

Gipahibawo na silang iya kadto sa iyang bana nga pulis.

Si Supt. Rodulfo Albotra, labaw ni Solante sa Provincial Command, niingon nga ang armalite bag-o lang giisyu ni Solante aron ilang magamit sa bag-o lang nahuman nga Annual General Inspection (AGI) isip sakop sa Special Reaction Unit (SRU) ug nagsilbing sniper.

Si Albotra niingon nga kon subayon gayod ang lagda silang mga pulis di na mahimong  sak-on pa sa balay tungod kay nagkinahanglan na man silag search warrant apan bisan pa niini gisaka gyod sa mga pulis.

Apan si Senior Supt. Patrocinio Comendador pangulo sa Cebu City Police Office (CCPO) daling nanalipod sa gihimo sa iyang mga sakop.

Matod niya nga lihitimo ang operation sa iyang mga sakop.

Nisaka sila sa apartment nga adunay pagtugot sa asawa ni PO3 Solante tungod kay ang ilang nadawat nga alarma taas nga armas ang dala.

Apan si Solante niingon nga napugos sa pagsugot ang iyang asawa sa pagpasaka sa mga pulis sa ilang apartment tungod sa kahadlok ug gawas pa nisulti ang
nga pulis nga ipakuha ang armas sa ilang labaw.

Apan sa ilang pagsulod ang asawa nipasangil nga nawala usab ang iyang kuwarta nga kapin sa P300,000 ug mga cellphone.

Ang asawa ni Solante nagplano nga mokiha gayod sa mga pulis sa Fuente ug sa Mobile Patrol tungod sa pagsaka sa balay nga walay search warrant, pagkabastos nga nakig-estorya kaniya ug ang pagkahanaw sa iyang kuwarta ug cell phone.


Linkback: https://tubagbohol.mikeligalig.com/index.php?topic=22677.0