MikeLigalig.com

Piniliay sa SK Federation nabulingan sa pamulitika
Ni: Andy Nalzaro

NABULINGAN sa hugaw nga pamulitika ang bag-ohay nga nahuman nga piniliay sa Sangguniang Kabataan Federation palibot sa lalawigang Bol-anon niadtong Huwebes, Disyembre 6 ning tuiga.

Kini ang obserbasyon sa kinabag-ang Bol-anon nga nahinabi sa dyTR ug Bantay Balita. Tinubdan sa dyTR ug JBBN nagbutyag nga ang palit sa usa ka SK Chairman sa usa ka lungsod moabot ngadto sa P25 mil matag-usa samtang ang nagmaniobra niini pulos naggunit og mga puwesto.

'Moabot pa gyuud na og P50 mil kun sa provincial federation,' asoy pa sa maong tinubdan. Sa dakbayan sa Tagbilaran, ang aspirant sa pagka-presidente sa SK nga si Michael Angelo Kapirig, SK Chairman sa barangay Poblacion I nagmagul-anon lakip na ang iyang mga ginikanan nga sila City Councilor Edgar Kapirig ug Ginang Gertrudes "Neneng" Kapirig human ang kandidatura sa batan-ong Kapirig giingong gihilabtan sa usa ka suod nga higala sa city hall.

Sigun sa taho nga nahipos sa JBBN nga si Kapirig kinsa ijado kun kinugos ni Tagbilaran City Mayor Dan Lim giingong gibiyaan human nialisngaw ang panagbangi sa iyang amahan nga konsehal batok kang deputy mayor Mariano "Mario" Uy gumikan sa isyo sa Botika sa Katawhan.

"Naluoy gyud ko ni Michael kay ilang gipasaligan, " Kini maoy masub-anong asoy pa ni Ginang Kapirig sa JBBN. Matud niya nga wala gayud sila mag-apas sa maong posisyon gumikan ang city hall gayud ang nangusog niini apan nakaapekto gayud kini sa pagkatawo sa iyang anak.

Si Michael dihang gihinabi sa JBBN nga gisultihan siya sa usa ka taas nga opisyal sa city hall nga mo-us-os nalang kini sa pagka-bise presidente.

Sayo niini, sigun ni Ginang Kapirig nga si Mayor Lim nakigtagbo sa mga ningdaug nga mga SK chairman sa 11 ka mga barangay ning siyudad ug ninghatag og usa ka instruction nga si Michael gyud ang pagapaluyohan niini sa piniliay sa pederasyon.

Apan gumikan sa panagbingkil ni Kag. Kapirig ug ni Uy nikalit lamang og iso ang buko sa kawayan gumikan lamang sa maong hitabo.

Sa resulta sa election sa SK Federation diin gihimo didto Sayas Resturant ning dakbayan, si Dampas SK Chairman Rammy June "Ram Ram" Alturas maoy ninglusot isip bag-ong presidente sa SK Federation human niini giparot si Poblacion 2 SK Chairman Alberto Manuel " Am Am" Yap- Dela Serna sa boto nga 11-4.

Samtang si Michael maoy napili isip bise presidente sa samang boto. Samtang didto sa Loboc, si Jake Jala, SK Chairman sa Poblacion Sawang nidaug batok kang Jon Rey Cempron, SK Chairman sa barangay Alegria sa boto nga 17-8.

Sa Loay, si Ruchelle Brigette Imboy, anak ni Loay Mayor Rosemarie "May" Lim-Imboy maoy napili isip SK Federated president.

Samtang sa Trinidad, si Jane Cajes, manghud ni outgoing Provincial SK Federation president Francis "Bobbith" Cajes ug anak ni Kongresista Ondoy Cajes ug Trinidad Mayor Judith Cajes maoy nigawas nga mananaaug.

Sa Bilar si Ma. Fe Cadeliña, anak ni Mayor Fanuel Cadeliña.

Techno Gabay Awards ilusad


Gitakdang ilusad sa Disyembre 12 ning tuiga, ang Techno Gabay Awards alang niadtong mga Farmers Information and Technology Services (FITS) centers nga nakapakita sa maayong mga serbisyo ngadto sa katawhan.

Tumong niini nga mapalapdan ang mga serbisyo sa FITS center, mapalambu ang commitment sa mga tagdumala ug makahatag ug dugang kahibawo sa katawhan sa mga serbisyo ug kagamitan sa FITS.

Ang panagtigi salmotan sa 29 ka mga lungsod nga anaa ang FITS, diin ang mga kategoriya naglangkub sa Best FITS Center, Most Outstanding FITS Manager, Most Outstanding Information Services Specialist (ISS), Most Outstanding Technology Services Specialist (TSS), Most Otstanding Magsasaka Siyentista (MS), Best FITS Products, Best MS Farm, Most Creative Information, Education and Communication (IEC) Materials ug Most Cooperative Local Government Unit (LGU).

Ang Techno Gabay Awards ilusad atol unya sa 1st Kaabag Congress nga ipahigayon didto sa CVSCAFT Main Campus sa Bilar, diin gilaumang maghatag bulok sa kalihokan mao sila si Gov. Erico Aumentado, V-Gov. Julius Herrera, Richard Juanillo ang Executve Deputy Director sa Philippine Council for Agriculture, Forestry and Natural Resources Research and Development (PCARRD) ug uban pa. (Aida M. Tanghal)

1st KAABAG Congress himoon

Dili mominus 300 ka mga mag-uuma nga kaabag sa Assistance for Barangay Agricultural Growth (ABAG), ang gilaumang motambong sa labing unang Kaabag Congress nga ipahigayon sa Disyembre 12 ning tuiga didto sa CVSCAFT Main Campus sa lungsod sa Bilar.

Ang kalihokan nga gipasiugdaan sa kagamhanang pinaagi sa Provincial Agriculture’s Office (PAO), anaa na karon sa ikaduha ka tuig nga pagpatuman ug nagdala sa tema: ABAG :Taytayan sa Malongtarong Teknolohiya Ngadto sa Kalamboan.

Ang programa nga nagtudlo sa mga maayong pamaagi sa pagpanguma, napatuman na diha sa mga kalungsoran ning lalawigan sama sa lungsod sa Alicia, Batuan, Bilar San Miguel, Sagbayan ug Sierra Bullones.

Tumong niini nga mapalig-on ug maghimo sa mga mag-uuma ug mga entrepreneurs nga makabarog sa ilang kaugalingon, pinaagi sa paggamit sa malungtarong panguma, nga giilang usa sa mga stratehiya ni Gov. Erico Aumentado sa pagpakigbatok sa kawad-on.(Aida M. Tanghal)

Shipyard andam ipahiluna sa Koreano sa Bohol

Usa ka Koreanong kompanya ang mipadayag ug kasibut ngadto kang Gov. Erico Aumentado sa pagpahiluna ug shipyard dinhi sa Bohol.

Kini ang gibutyag sa gobernador atol sa iyang senemanang tahu sa mga Bol-anon, pinaagi sa mga sibyaanan ning lalawigan human sa iyang pagtambong sa kalihokan nga may kalambigitan ang turismo ug ubang mga kalambuan didto sa South Korea.

Matud sa gobernador nga ang kompanya andam nga mopahiluna sa shipyard dinhi sa Bohol, apan ubos sa kondisyon nga kinahanglan ang Bohol makasupply ug egong koryente alang niini.

Kini tungod kay ang shipyard palang nagkinahanglan na ug 200 mega watts, samtang ang lalawigan adunay 164 mega watts lamang nga pundo diin 58 niini ang atong nagamit.

Apan gipasabut sa amahan ning lalawigan nga ang tinguha nga pagkabaton ug egong supply sa koryente sa Bohol atong makab-ot, sa higayon nga mahatagan ug katumanan ang gilarawng Cebu – Bohol Multi Access Bridge nga magdugtong sa duha ka mga probinsiya dinhi sa kabisay-an.(Aida M. Tanghal)

Biyuda biktma sa pagpangoot, P31,000.00 kapin ka pesos

Usa ka biyuda ang nasagmuyo biktima sa pagpangoot ug kwarta sa kantidad kapin P31,000.00 sa wa mailhing suspetsado.

Ang biktima giila sa pangalan Porferia Gallego y Planos, usa ka magpapatigayon sa Pambujan Northern Samar ug kasamtangang nagpuyo sa barangay Basac sa lungsod sa Loon.

Nahitabo ang maong insidente niadtong Disyembre 2, 2007 alas 9:00 pasado ang takna sa buntag particular didto sa merkado publiko sa maong lungsod.

Sa pakighinabi sa JBBN sa biktima matod pa samtang mipalit siya ug isda didto sa merkado sa maong lungsod, samtang mobayad na unta siya sa paghiling sa iyang cluch bag nga didto gibutang ang iyang pitaka abri na ang zipper sa maong bag ug wala na ang iyang pitaka nga may sulod nga kwarta sa kantidad nga P31,000.00 kapin gikuot sa wa mailhing suspetsado.

Samtang ang maong kaso gitugyan na sa mga tinugyanan sa balaod aron pagpangita sa mga responsible nga mihimo sa mga modus operande sa pagpangoot. Boy Luzon

Babaye napalgang patay diha sa iyang panimalay

Ang elemento sa kapolisan sa lungsod sa Loon pinangulohan ni PO3 Emerito Paulino, PO1 Alexander Nunez ug PO1 Exequel Molina meresponde dayon sa tawag sa telepono sa barangay kapitan sa barangay Cantomucad sa maong lungsod nga adunay napalgang patay sa balay sa pamilyang Pena, ug sa mga pakisusi nga gihimo sa kapolisan nasayran ang biktima giila sa pangalan Rosita Pena y Rebucas, 56, minyo ug nagpuyo sa nahisgutang dapit.

Sumala pa sa imbestigasyon sa kapolisan nadiskubrehan ang patayng lawas niadtong Nobyembre 28. 2007 didto mismo sa balay sa biktima dapit sa may banyo nga wala nay kinabuhi.

Matod pa sa tinubdan sa mga taho tulo na ka adlaw nga wala mag-abre sa bintana sa balay ang maong biktima, gumikan sa kabahio sa palibot ang mga silingang balay naalarma sa dili na maagwanta nga kabaho ug maoy hinungdan nga mga tinugyanana sa balaod ilang nakita nga nag-inusara ang biktima.

Nasayran sa JBBN nagpuyo nga nag-inusara ang biktima kay ang iyang bana adunay negosyo sa Mindanao ug ang iyang mga anak usab adunay kaugalingong panimuyo sa laing dapit.

Matod pa sa anak sa biktima ang kamatayon sa iyang inahan adunay nagpaluyo nga foul play, hinungdan mohimo sila ug mga lakang aron mopatigbabaw ang hustisya sa wa damhang kamatayon sa ilang inahan. Boy Luzon

Catigbian Padayong giduaw sa mga LGU gikan sa Sulod ug Gawas sa Bohol

Ang mga sakop sa Sangguniang Bayan sa lungsod sa Kalilangan lalawigan sa Bukidnon nga gipanguluhan ni Bise Mayor Atty Ramon Gamboa mibisita sa lungsod sa Catigbian sa milabay nga Lunes (Desyembre 03, 2007).

Ang pagbisita sa SB Kalilangan isip kabahin kini sa ilang Lakbay Aral Program. Ang grupo mainitong giabi-abi sa Local Government Unit sa Catigbian nga gipangulohan ni Mayor Bert Salinas.

Gipakita sa mga bisita ang ilang kaintresado sa livestock auction center, public market operations and plans, implimentasyon sa mga programa lakip na sa han-ay sa ilang munisipyo diin ang mga kunstitowente mahatagan gayod ug pagtagad ug atensyon pinaagi sa ilang gitawag ug People’s Lounge nga didto sila mo-relax samtang nagpaabot sa ilang mga transaksyon .

Ang mga bisita naminaw sa usa ka unit briefing uban sa ug libri usab silang makapasupot ug mga pangutana samtang ang LGU malampusong mitubag alang sa kasayuran sa mga bisita.

Nakadayeg kaayo ang SB Kalilangan sa administrasyon sa Catigbian ug nagplano nga muhimo sa mga susamang mga programa sa ila unyang pagbalik sa ilang lungsod sa Bukidnon.

Samtang sa laing bahin gipahalipayan ni Mayor Bert Salinas ang mga napiling opisyal sa pederasyon sa Sangguniang Kabataan sa lungsod sa Catigbian atol sa gipahigayong piniliay sa milabay nga Desyembre 6, 2007.

Ang mga napili nagalangkob nila ni Nick Niño Ladroma-Presidente nga maoy milingkod isip sectoral representative sa Sangguniang Bayan sa Catigbian nga nagrepresentar sa SK, Emma Patolilic- Bise Presidente, Shiela Mae Maluenda-Secretary, Rhea Mae Catayas-Treasurer, Benhor Solatrero-Auditor, Erwin Rey Llorente – PRO ug Rey Anthony Magsino- Sgt. At arms.

Gipanghinaot sa mayor nga tinuod gayod nga mabati ang tingog sa mga kabatan-unan isip maoy mga sumusunod nga mga leader sa comunidad ug sa nasod.

Kon kahinumduman nga ang mayor mihatag ug pagtagad alang sa kaayuhan sa mga kabatan-unan sa iyang lungsod pinaagi sa pag-abag sa mga kalihukan sa tulunghaan. Nestor Daarol.

Magtutudlo sa publikong tulunghaan gibansay alang sa kalambuan

Upat ka adlaw ang gipahigayong pagbansay-bansay sa mga magtutudlo sa publikong tulunghaan sa elementarya sa Cogon Norte sa lungsod sa Loon, ubos sa pagsuperbisar ni Vicente Sagetarios ang Head Teacher sa maong tulunghaan.

Ang maong kalihokan ubos sa kamanduan sa Division Memorandum sa DepEd No. 226 Series of 2007. Nagsentro ang maong kalihokan alang sa kalambuan ug mga maayong pamaagi sa pagtudlo particular sa mga magtutdlo ug ngadto sa mga kabataan, aron makabaton ug igong talento ug mithi sa natad sa edukasyon.

Sa maong kalihokan gipaubos sa cluster nga gisalmutan sa 19 ka mga niapil nga mga magtutudlo sa tulunghaang elementarya sa Napo, Agsoso, Tubodio ug Cogon Norte nga maoy lugar diin gipahigayon ang pagbansay-bansay.

Nasayran sa JBBN ang mga facilitators mao si Inocencia Reyes, Vicente Sagetarios, Meredith Dacoyla, Pedro Seprado, Trinidad Tubaces, Marybeth Dano, Noemi Catayas, Marilyn Oberio ang Resource Manager ug Rebecca Nazareno ang Finance Officer.

Ang konsepto sa maong kalihokan aron mapaugmad ang ilang classroom instructional improvement plan (CIIP) ilabi na sa academic classroom facilities ug pisikal program ngadto sa mga kabataan nga gihan-ay na ngadto sa tuig 2010.

Subay niini pagapalapdan ang kasinatian sa mga magtutudlo aron magpabilin ang kasibot ug kamadasigon sa pagtudlo ngadto sa mga kabataan aron makabaton ug kalidad sa maayong pagtuon. Boy Luzon

Sevilla mopahinungod sa ilang patron “Our Lady of Guadalupe”


Ning kasaulougan sa Fiesta sa patron Our Lady of Guadalupe sa lungsod sa Sevilla gipangandoy ni Mayor Pinny Digal nga hatagan pa unta sila ug daghang mga proyekto karong sunod tuig.

Ang kapistahan sa Berhin sa Guadalupe sa Sevilla karong adlaw’ng Martes ug Miyerkules (Desyembre 11-12, 2007) panguluhan nila ni Mayor Pinny Digal sa Local Government Unit sa Sevilla ug Father Felix Cleofas Silagan sa simbahan.

Ang siyam ka adlaw nga palakaw sa nobena gisugdan sa milabay nga Lunes Daesyembre 03, pinaagi sa usa ka parada sa may alas 4:00 nga gisalmutan sa mga estudyante sa Christ the King Catechetical Center, Sevilla Central Elem. School ug Sevilla National High School.

Ang Nobena sa unang adlaw gipasiugdahan sa Barangay Cabancalan samtang ang mesa gipasiugdahan sa barangay Licolico ug ang kalingawan gipasiugdahan sa National, Provincial ug Municipal Emloyees pinaagi sa Ballroom ug Disco.

Desyembre 04, nobena gipasiugdahan sa barangay Lagtangan, mesa gipasiugdahan sa CFD ug ang kalingawan gipasiugdahan sa ABC sa ilang Pista sa Nayon.

Desyembre 05, nobena gipasiugdahan sa barangay Calingaan samtang ang mesa gipasiugdahan sa barangay Calinginan Sur ug Couples for Christ, pagkagabii mihatag ug lingaw ang Cambagui, Calinginan Norte ug Bayawahan High School pinaagi sa usa ka Variety Show.

Desyembre 06, nobena gipasiugdahan sa barangay Lobgob samtang ang mesa gipasiugdahan sa Couples for Christ II ug ang kalingawan ubos sa pagdumala sa Sangguniang Kabataan pinaagi sa usa ka Disco.

Desyembre 07, nobena ubos sa pagdumala sa barangay Cambagui samtang ang mesa ubos sa pagpasiugda sa barangay Calinginan Norte ug ang kalingawan pinaagi sa Department of Education nga nagpasiugda ug usa ka variety show.

Desyembre 08, nobena barangay Bayawahan, mesa barangay Magsaysay ug Family and Life Apostolate samtang sa kalingawan mipahigayon ug disco ang Marish Youth Ministry (PYM).

Desyembre 09 karong gabii ang nobena pasiugdahan sa barangay Ewon, mesa PYM samtang ang kalingawan pasiugdahan sa Parish Pastoral Council pinaagi sa Dance Contest.

Desyembre 10, nobena barangay Guinob-an, mesa Legion of Mary samtang ang kalingawan pasiugdahan sa Sevilla National High School pinaagi sa usa ka variety show.

Sa besperas sa fiesta karong adlaw’ng Martes Desyembre 11, ang nobena pasiugdahan sa Barangay Poblacion samtang ang mesa pasiugdahan sa CWL Lay Liturgical Ministers, human sa prosesyon masaksihan sa mga katawhan ang usa ka bongga mga fireworks display nga ubos sa pagpasiugda ni Senador Migz Zubiri kinsa motambong sa maong kalihukan uban sa iyang kapikas sa kinabuhi.

Ang kalingawan bungga usab gumikan kay gitikon ang mga Sevillahanon sa pakatawa sa Dos Comediantes. Sa adlaw sa fiesta karong Desyembre 12, pukawon ang mga Sevillahanon sa usa ka Diana pinaagi sa Sevilla Band sa may alas 4 sa kaadlawon.

Pagasundan kini sa usa ka mesa. Si His Excellency Most Rev. Leonardo Medroso Opbispo sa Dayoses sa Tagbilaran mao ang modumala sa Pontifecal Mas sa may alas 10:00 sa buntag.

Pagkagabii ipahigayon ang panapos nga kalingawan pinaagi sa usa ka Live Band nga ubos sa pagpasiugda sa San Miguel Corporation.

Gipanghinaot ni Mayor Pinny Digal nga ning ilang pagpasidungog sa ilang patron Our Lady of Guadalupe dugang pa unya nga mga grasya ug proyekto ang moabot sa ilang lungsod.

Labaw nga gipanghinaot sa mayor mao ang kahiusahan sa mga leader sa Sevilla alang sa usa ka tumong nga mao ang kalambuan sa ilang pinanggang lungsod.-Nestor Daarol



Linkback: https://tubagbohol.mikeligalig.com/index.php?topic=7544.0