Ni Guam P. Logroño
Tuesday, October 18, 2011
LIOG sa ice buko vendor hapit maputol kay gigulgol sa iyang duha ka mga ig-agaw nga iyang gikasambunot
niadtong Dominggo sa buntag sa Barangay Tubod-Bitoon, lungsod sa Dumanjug, Sugbo.
Gawas sa liog, giputlan pa sa duha ka mga bukton si Bernardino Jacolbe, 39, minyo, dunay lima ka mga anak,
sa iyang duha ka mga ig-agaw nga sila si Artemio Jacolbe, 22, laborer ug manghod nga Si Arnel, 18, mangulingay.
Ang magsuong pulos taga Guihulngan, Negros Oriental, nadakpan sa kapulisan human sa krimen ug
gikatakdang pasakaag kasong murder karong adlawa.
Daan nang nagkabangi sila si Bernardino ug Artemio tungod sa giingong relasyon tali sa asawa sa biktima ug sa naulahi.
Giangkon sab sa asawa nga duna silay relasyon ni Artemio, apan ang suspek nanghimakak.
Si PO2 Rafael Baritua, desk officer sa Dumanjug Police Station nga nahinabi sa Sun.Star Superbalita,
nagkanayon nga love triangle ang hinungdan sa krimen.
Matod niya nga dugay nang nagkabangi ang suspek ug biktima kay nagselos tungod kay dunay relasyon ang iyang asawa ug si Artemio.
Ang magsuong Artemio ug Arnel didto magpuyo sa magtiayon, apan gipalayas sila ni Bernardino human siya
masayod nga nakigrelasyon si Artemio sa iyang asawa.
Tungod niini, ang managsuon gipalayas sa biktima hinungdan nga namalhin sa pagpuyo sa ilang silingan.
Niadtong Sabado sa hapon, ang managsuon uban sa asawa sa biktima ug tulo ka mga anak nga dalaga niini
nagkuyog sa pagpang-disco sa fiesta sa Barangay Panlaan.
Nasuko og maayo ang biktima sa iyang asawa ug niapas nianang Dominggo sa buntag sanglit wa gyud mamauli.
Apan nasugatan sa biktima mga alas 6 sa buntag ang iyang asawa ug mga anak kuyog ang mga suspek mga
100 ka metros gikan sa ilang balay hinungdan nga nahitabo ang panagkomprontasi.
Si Artemio niibot sa dalang sundang ni Arne ug gitigbas ang biktima sa makadaghan.
Bisan nalup-og na tungod sa kadaghan sa mga samad, ilang giputlan sa duha ka mga bukton ang biktima ug
di pa gyud igo, gigulgol ang liog sa biktima hinungdan nga nilugwa ang ubol-ubol.
Ang mga anak nga nalisang nakasangpit pa sa mga biktima nga hunungon na ang ilang gibuhat ngadto sa ilang amahan.
Gi-report ni barangay konsehal En-en Escandalo ang hitabo ug gidakop ang managsuong suspetsado ug nakuha
ang sundang ingon man shorts nga nagkadugo.
Matud pa ni PO2 Baritua, nga dunay struggle nga nahitabo sanglit nangahapay ang mga sagbot sa lugar nga
nagpakitang gitabangan gyud ang biktima sa mga suspek.
Ang mga suspek ilang giimbestigar human sa insidente ug giimbetar, apan pag-abot sa police station niangkon sa kremin.
Dugang nakuha nilang impormasyon nga ang managsuon nakapatay sa ilang lugar hinungdan nga nikagiw dinhi sa Sugbo.
Ang mga suspek mibutyag sa kapulisan nga ilang napatay ang biktima kay gipusil sila apan wa lang maigo.
Dunay .38 caliber revolver nga nakuha sa crime scene apan way bala.
Gipatik sa mantalaang SuperBalita Cebu Oktubre 18, 2011.
Linkback:
https://tubagbohol.mikeligalig.com/index.php?topic=43953.0