Thailand - Sa wala pa nako sulata kini nga column, nanihapon ko diri sa balay ni Bom. Siya ang nagluto para namo ni Sumit, akong Indian nga classmate sa MBA sama ni Bom. Silang duha ang akong mga barkada sulod ug gawas sa klase.
Human sa siyam ka bulan nga pagpuyo diri sa Thailand, nakaayon na pud ko sa mga pagkaon sa Thailand. Karong gabhiona, nabusog pag-ayo mi sa giluto ni Bom.
Apan dili ko maghisgut karon mahitungod sa kalami sa pagkaon sa Thailand. Mamalandong lang ko sa pagkawalay garbo sa mga Thai. Sama ni Bom nga giisip namo ni Sumit nga milyonaryo.
Upat ka Mercedes Benz ang naka-parking atubangan sa daw mansion nilang panimalay. Ug kilid ning maong balay sa iyang mga ginikanan mao ang laing balay nga gitukod ni Bom nga matod pa niya gigahinan niya ug 2.4 milyon baht (1 bath mobalor ug 1.35 pesos).
Dili na maihap ang mga gabii ug adlaw sa akong pagpuyo sa balay ni Bom matag karon ug unya kauban si Sumit. Kung wala miy klase, manawag si Bom nako ug mangimbitar nga didto magpalabay sa Sabado ug Domingo sa ilang balay sa Bangkok. Dili kompleto ang grupo kung wala si Sumit.
Kanhi gobernador sa usa ka probinsya sa Thailand ang amahan ni Bom. Midagan ug senador ang iyang amahan niadtong niaging eleksyon apan napakyas sa iyang tinguha. Matod ni Bom, nagplano ang iyang amahan nga mosalmot sa bugnong lugaynon sa sunod nga hugna.
Aduna usay pangandoy si Bom nga mahimong politiko sa Thailand ug mosunod sa mga lakang sa iyang amahan. Samtang si Sumit nagdamgo nga makapundar ug negosyo diri sa Thailand ug dili na manimuyo sa India.
Didto sa New Zealand natapos ni Bom ang iyang high school ug sa Australia siya ni-graduate sa kolehiyo.
Bisan pa man sa mga naangkon ug nakab-ot ni Bom sa kinabuhi, nakaingon mi ni Sumit nga bulahan mi nga nakahigala ni Bom tungod sa iyang kamapainubsanon.
Inay nga kami kintahay mohatag kanunay ug pabor para ni Bom, siya na man hinuon ang nagsilbi namo. Matod niya namo ni Sumit, pareha ra mi nga tawo ug walay ubos ug ibabaw kanamong tulo.
Nakahinumdum ko sa akong amigo sa Negros Occidental nga nakapuyo diri sa Thailand kaniadto. Miingon siya nako nga kung ikomparar niya ang mga tawo sa Bangkok ug mga tawo sa Manila, makaulaw daw kaayo. Nangutana ko kon ngano. Matod niya: “Wa silay garbo sa ilang kinabuhi. Way daghang pagarpar dili sama sa mga tawo sa Manila.†Dili lang seguro sa Manila, lakip na usab sa ubang mga lumulopyo sa atong nasod.
Laing higala nako nga dugay na sab nakapuyo diri sa Thailand misugilon nako mahitungod sa usa ka maanyag nga flight stewardess sa Thai Airways nga dili maulaw maninda ug bisan unsang ginagmay nga butang sa mura ug merkado nila pagkahuman sa iyang trabaho.
Daghan sa mga Thai ang makit-an nga mag-uma sa ilang kayutaan apan makita usab sa daplin sa dalan nga naka-parking ang ilang mga Pajero, Honda, Toyota o kaha Chevrolet.
Mao ni sa usa sa mga dakong kalainan natong mga Filipino sa mga Thai. Ug si Bom usa sa mga tawo nga nahimo nakong dakong ehemplo sa pagpaubos.
Karon dako na kaayo ug deperensya ang pag-uswag sa Thailand kon itandi sa Pilipinas.
Ug ato nang nahibaw-an nga mga tawong magpaubos ipataas sa kaulahian.
written by M. Ligalig
published by
The Bohol StandardLinkback:
https://tubagbohol.mikeligalig.com/index.php?topic=1924.0