from my column in theboholstandard.comAdunay pagtuon nga gihimo sa Britanya nga nagtug-an nga ang kabanggiitan sa usa ka tawo dili nagagumikan sa iyang natural nga abilidad.
Walay kapasikaran ang giingon nga ang pagkahanas sa usa ka butang, sama pananglit sa pagsulat o sa pagdula sa basketball, nagagumikan sa iyang natural nga pagkatawo nga nakuha sukad pa sa tago-angkan sa inahan.
Matod pa ni Michael J. Howe, Jane W. Davidson ug John A. Sluboda, mga eksperto didto sa Britanya, ang mga ebidensya nga ilang nahipos mopamatuod nga sayop gyud ang kasagaran nga gituohon nga “natural ability.â€
Sa akong panan-aw, kining maong tinuohan sa “natural ability†nakapadeskorahe sa uban sa pagkab-ot sa ilang mga damgo ug pangandoy sa kinabuhi kay lagi wala sila nianang maong natural nga gasa. Igo lang sila mohangad sa uban nga mga gitawag ug kuyaw ug abilidad. Ug magpabilin nalang sila sa kasamtangan nilang pagkabutang.
Pagmata! Kitang tanan adunay katakos nga makakab-ot sa atong gitinguha kung aduna kitay paghago, pagpailob ug padayon sa pagbansay-bansay sa atong hilig.
Atong himuong sanglitanan si Tiger Woods nga kampyonato sa golf sa tibuok kalibutan. Nahibalo ka ba nga usa ka tuig ug unom pa ka bulan si Tiger Woods sukad siya gianak ginatun-an na siya sa iyang amahan kung unsay golf ug unsaon pagdula niini?
Imbis nga mamiyabas si Tiger Woods sa panahon sa iyang pagkabata o kaha magdula ug tumba-lata, nagbansay na siya ug golf sa sayo pa nga edad.
Ug angay nato mahinumduman nga bisan ug labing batid na si Tiger Woods sa golf, hangtud karon nagagahin siya ug daghang mga oras kada adlaw sa pagbansay-bansay.
Moadto ta sa kinabuhi ni Bobby Fischer, ang labing bata nga kampyon sa kalibutan sa dulang chess ug nga nahimong grandmaster sa edad pa nga dise-sayes. Siyam ka tuig ang gigugol ni Fischer sukad sa iyang pagkagamay pang bata diha sa pagdula ug chess.
Nan karon, unsay mga hiyas nga angay natong batonan aron mahimo tang kuyaw?
Kasagaran kanato pul-anon kaayo. Mosugod lang kadiyot ug dili molahutay. Ang uban nakasugod na, apan dili molahutay sa unahan.
Ang mga kinaiya nga ingon niini, sa akong pagsabot, usa sa mga hinungdan nga daghan sa atong mga kaigsuonan ang way pag-uswag sa kinabuhi. Dali ra kaayo nga mobalik sa agianan kung hangak na ang tungasonon.
Unang kinaiya nga gisugyot sa mga eksperto mao ang paghago o pagpuga gyud sa atong singot.
Matod pa sa atong mga katigulangan: “Ang dili mag-antos, dili masantos.†Kung dili kita motalaw sa kalisud, aduna gyoy maani ang atong mga paningkamot. Nagbansay-bansay si Tiger Woods sa golf sulod sa kinse ka tuig adusa siya moapil ug torneyo, ug nahimo siyang kampyon sa eda nga dise-otso.
Ikaduhang hiyas mao ang makanunayon nga pagbansay-bansay sa atong hilig.
Tinuod dili sayon ang pagbansay-bansay kung kini magkanunay. Apan mao lang kini ang paagi nga mahimo tang hanas, mahimo tang eksperto. Mao kini ang sekreto ni Michael Jordan. Nipahulay na ang iyang mga kauban sa pag-practice, apan si Michael Jordan nagsige gihapon ug itsa-itsa sa bola.
Kataposang hiyas mao ang pagpailob. Pailob ug magpasensya taliwala sa kapakyasan. Kung adunay sayop, himuon kini nato nga kapanaminan, ug atong paningkamotan nga mahipno na ang sayop nga paagi sa sunod higayon.
Ug labing mahinungdanon, mao nga ubanan nato sa mga pag-ampo atong mga paningkamot.
Kung wala ang pagpanalangin sa Ginoo, wala gyud tay mahimo.
Linkback:
https://tubagbohol.mikeligalig.com/index.php?topic=3864.0