Usa Kagabiing Walay Banig By Mike Ligalig
The Bohol Standard
Bag-o lang didto sa England, si Prince William, agi ug pagsuporta sa kalihokan sa usa ka charity organization, miipon ug tulog kauban sa mga walay pinuy-anan sa London sulod sa usa ka gabii. Gihimo kini ni Prince William aron iyang masinati ang kapait sa kinabuhi sa gitawag ug mga “homeless of London.†Wala pa niya masulayi masukad ang pagtulog duol sa tulay nga bantaaw sa hilabihan ug dili matukib nga katugnaw.
Ingnon tang pulonga nga walay banig si Prince William nga naghigda (pero dihay sleeping bag lang) sa nangamig nga semento daplin sa Blackfriars Bridge didto sa central London. Negative four ang temperatura niadtong gabhiona.
Matod pa sa balita sa BBC, gikutlo ang gipamulong ni Prince William: “I could not even begin to imagine what it must be like to sleep rough night after night. The experience had deepened my understanding of homelessness.â€
Nabaniog sa tibuok kalibutan ang gibuhat ni Prince William. Daghang nakadayeg sa iyang pagtulog uban sa mga homeless bisan usa ra kagabii. Hinuon, diha ra gihapoy nagpahipi nga mga royal security guard para kang Prince William kay basin uroy ug maalaan ug mapareglahan siya sa mga hubog ug sabog niadtong lugara.
Kung kita to ang nakigduyog sa katugnaw sa kahimtang sa mga homeless, wala seguro poy media nga motagad bisan pa seguro ug dose ka bulan natong hinigda ilawom sa Mactan Bridge o di ba kaha diha atbang sa Agora talay sa BQ Mall. Bisan nalang seguro ug erratum, walay newspaper nga manumbaling ngano nga nagwaswas ug nagbilangkad ta diha daplin sa CPG Avenue.
Pero mao gyud ni ang dagan sa kalibotan. Ang mga sama nila ni Prince William mohakot gyud ug pagtagad bisan unsa ang ilang pagabuhaton, madaotan man o mamaayo. Pareha ba ni Tiger Woods nga gipestahan ang taho nga aduna diay siyay katorse ka sideline. Ingnon tang pulonga nga bisan arang gwapaha ug seksiha ang asawa ni Tiger Woods kay model lagi, apan ang golf champion nagduwa gihapon ug laing team. Kung si Talpolano lang ang nagtakin ug lima ka dosena nga rosas pandan (maayo kay wa magsangkiig si Tiger Woods), walay media ang manumbaling. Pero kay si Tiger Woods man, wala long-i sa world media sa pagsumsom ug tabi ang pagkadokirok ni Tiger Balm, este Tiger Woods.
Balik ta ni Prince William. Maayo pud to nga iyang nasulayan ang pinobre nga kahimtang bisan usa lang ka gabii aron molawom ang iyang panglantaw sa kinabuhi. Lahi man gud ning puro lang ta estorya ug press release mahitungod sa pagpakabana sa mga kabos, unja wala diay katilaw bisan kausa unsay kinabuhing magtuslo ug asin, magpais ug ginamos, mag-anag ug mais, maglugaw ug binlod ug tiktik, manug-ab ug hanging hungaw.
Mao bitaw nga ganahan ko si Manny Villar mahimong presidente sa Pilipinas kay nakahibawo man gud ni siya ug unsa gyoy kinabuhi nga hugot-bakos. Maninda lang gud ug barbeque sa Tondo ni si Manny Villar. Apan tungod sa iyang kakugi ug paningkamot, nahaw-as siya sa kawad-on. Sa tanang mikandidato ug presidente, si Villar lang ang tinuod gyud nga nagdahik sa kapobre sa sinugdanan. Si Noynoy, mga haciendero man ni sila. Si Gibo, mga who’s who naman ni sila. Si Gordon, mga elite ni sila sa Olangapo. Si Erap, dili ko interesado. Ambot.
Karon nahinumdom ko, si Gloria diay pud. Wala ni kasuway si Gloria mamiyabas para ipamahaw. Presidente man to sa Pilipinas ang iyang amahan. Nagdako ni si Gloria nga naay yaya nga tig-ilis sa iyang lampin. Wa ni katilaw ug law-oy kamunggay o kaha miki ug odong nga gilangoyan ug Young’s Town para paniudto. Wa ni katilaw si Gloria ug bangsi nga buwad nga iitsa sa baga, unja inig pangalimyon na sa sinugba ibalhin na sa sartin bisan arang daghana pang abo, unya yab-an dayon ug aslom suka – impas ang panihapon – pwede na magbukot ug habol inig human ug panghingiki.
Nag-ilaid ug samot sa kalisod ning atong nasod kay sama ni Gloria, kasagaran sa mga namunoan wa moagi ug kawad-on. Kung dili anak ug don ug donya, mga anak nang daan sa mga tadhang politiko sa ilang lugar.
Hinuon, dili nato sabton nga kung ang usa ka tawo nga gikan sa kakabos, unja naharahuhay, maantigo nang molingi sa mga timawa uyamot. Naa uroy poy mga kabos sauna, unja nadato, nahimo man hinuong mangtas ug hilabihang ngil-ara ug batasan ug nag-awas-awas ang garbo sa kinabuhi. Mura naman ug si kinsa kung manulti, unja kusog matamihid kanatong mga dinuyan sa balod ug inanod sa sulog. (Sayon ra sa pag-ila aning klaseha sa mga tawo: pangutan-a lang ang ilang mga helper sa balay).
Ang atong Ginoong Hesukristo, bisan sa iyang pagka-Diyos, pagka-magbubuhat ug pagkalabaw sa tanan, nikanaog gikan sa langit, nagpakatawo sa kalibotan, ug nipuyo uban kanato sulod sa trayntay-tres ka tuig. Nagkanayon ang Balaang Kasulatan nga si Jesus nahibalo pag-ayo kon unsay kagutom, kainit, katugnaw, kasakit, kapait, kauhaw, kakapoy, kamingaw, kaguol sanglit Siya nagpakatawo man ug nagpuyo sa kapobrehon didto sa Israel.
Kung si Prince William usa lang kagabii nasinati niya ang kapait sa kinabuhi, ang atong Ginoo natagamtaman Niya ang kalisud sukad sa iyang pagkatawo hangtod nga gilansang Siya sa krus aron ang atong mga sala mapasaylo ug makabaton ang tanan nga motuo kaniya ug kinabuhing walay kataposan.
Tukma pud tong gibuhat ni Prince William aron pud ta makahinumdum sa tinuod nga mensahe sa pasko (nga dili intawon si Santa Claus ang nagkandonsingot), aron mapamalandongan nato ang sakripisyo sa atong Labawng Makagagahom.
Linkback:
https://tubagbohol.mikeligalig.com/index.php?topic=24435.0
Topic: Usa Kagabiing Walay Banig (Read 3343 times)