MikeLigalig.com

Unsaon Pagpaminaw sa mga Balod sa Dimiao
gitagik ni Mike Ligalig

Ligad sa lapad nga lingkoranan ilawom sa kahoyng nangalarag
na ang mga dahon, sa kahoyng gibatugan sa hapit na matun-as nga payag.
Kon duna kay panyo o shol himoa kanang unlan: gansang-gansangon ang tabla.
Aninawa ang kalikopan sa dili mo pa ipiyong ang imong mga mata.
Palupara ang imong mga mata ngadto sa kapunawpunawan;
makita mo ang pultahan sa kabitoonan nga gitrangkahan sa kahayag
unya baliki pagsud-ong ang gagmayng dahon sa kahoy
nga mikiay-kiay sa matag talidhay sa dagatnong hangin.
Sud-onga usab ang mga dahon sa saging nga nagwarawara
daw buot makig-cha-cha uban sa huros sa hanging amihan.

Piyonga karon ang imong mga mata: makita mo ang kalinaw.
Ipatong ang tuo mong kamot sa imong dughan, ang wala sa tiyan.
Ituy-od ang imong mga bagtak ug ayaw gyud ug tikoko o takilid.
Unya, ablihi ang mga bintana sa imong dalunggan kay modungaw ang kahilom.

Pamatia karon ang naglagumo nga haganas sa mga balod sa Dimiao
ang yagubyob sa dughan sa baybayon matag tamparos sa balod,
dili ba daw mananoy nga awit ang kalanrakas sa mga balod?

Paminawa ang nag-asod nga kadagatan, gidugmok sa kabangis sa habagat.

Pamatia pag-usab ang matag kabya sa balod basin adunay gihatod
nga mga gapnod sa lawod, mga sinalikwayng kahoy gikan sa Mindanao.

Unya ginhawa ug lawom, kanang hinukad gikan sa kahiladman
ug mabatyagan mo ang imong gininhawa nga gisawod sa adlaw,
iyabo kini ngadto sa nagbukal nga dagat ug ang imong gininhawa

mahimong mga koya sa mga balod sa Dimiao.

Ug paminawa karon ang kaugalingon mong mga balod sa kinabuhi,
mga balod nga gibuklad sa Labawng Makagagahom,
nga molampornas sa imong galamhan matag karon ug unya.

Imong mahibaw-an nga ang mga balod sa Dimiao
wala nagyawyaw aron mahigmata ang imong handurawan
kon dili aron ikaw makapahulay gikan sa kasaba sa kalibotan.

Linkback: https://tubagbohol.mikeligalig.com/index.php?topic=3695.0