Ug Magsulat Ako Ug Balak Alang Kanimosinulat ni Mike Ortega Ligalig
magsulat ako ug balak alang kanimo
pag-abot sa tungang gabii diin ang kahilom
mao ra ang akong kauban, ang kahilom
nga nagdugo ug miawas ang kaguol
sa akong mga paghandum, ang kapait
sa imong kahilom, sa imong pagpalayo
magsulat ako ug balak samtang nagpaabot
sa imong mga pulong, sa imong pahiyom
bisan ug nagping-it sa kasakit
ang dughan sa kagabhion
wala ka masayod nga ang matag tunob
sa taknaan samtang ako nagpaabot kanimo
daw mga lakang sa katuigan nga nag-antos
wala mo nakita ang nagusbat kong kasin-kasing
sama sa bantayog nga gibuak sa linog
kay ako gitay-og sa kahapdos sa pagsalikway
ug ako magsulat ug balak alang kanimo
pamasin matambalan ang samad sa kagabhion...
Linkback:
https://tubagbohol.mikeligalig.com/index.php?topic=43615.0
Topic: Ug Magsulat Ako Ug Balak Alang Kanimo (Read 1086 times)