sinulat ni Dr. Linda Alburo
(Ang katunga sa mga tradisyunal nga balak
bahin man sa nagkalain-laing pagkapulak
ug sa pagwanglawos sa kanhi pulang mga bulak.
Karon kay puol-puol na ang samang pagpamulong
mangita gyud kon gbag-ong ikabudyong
samtang naghulat kanus-a motikungkong.)
Tinuod, kini diyang moabut og kalim-an
magsugod nagbalikbalik ang sud-an
kay daghan nang ginadilinglami-an.
Hait paminawon ang elektrik nga gitara
kay lagi na-anad ta sa huning Frank Sinatra
ug tungod kay promdi gimingaw sa karaang arpa.
Sa buntag modungaw samtang bag-ong mata
buot motugpa ang panan-aw sa lunhawang akasya
kanang walang masangit sa habog nga karatula.
Inigkagabii pod mohanggap unta sa sampaguita
sama ba adtong mibangaw sa kang Mamang arkada
apan unsa nang baho-a, di nauban ba nga serbesa?
Alang kanako, layo pa kaayong baklayon
ang dalan padulong sa Loyolang lungon
mangaway pa kog kinsay maayong sulngon:
Ga-i ko dihag dili makakanser nga hamonada
padungga kuno kog mananoyng Ave Maria
unya tamni kog malandong nga banaba
ug sa dili pa ko mopiyong, patagamtama
intawon kon unsay lami anang marijuana.
source: panitikan.com.phLinkback:
https://tubagbohol.mikeligalig.com/index.php?topic=208.0
Topic: Sa Pagtungtong Nakog Singkwenta (Read 1912 times)