mianhi ko sa Cebu
aron maglulinghayaw
aron magsuroy-suroy
naunsa ba hinuon
matag karon ug unya
gisunodsunod man ko sa kakulba
nga basin sa akong pagwagdoywagdoy
pagpaharuhay sa SM ug Ayala
basin ikaw akong makita
sa wa damha
kita unya magkatinutokay
mahimo kong estatuwa
ug mabato ka
ngano kaha?
ahh, dugay na man gud
wa na ta magkasinayranay sa usag-usa
human gitalikdan ta
ang pantalan sa atong kasing-kasing -
moadtoay ka man gud sa Amerika
maong naghiningalimtanay na lang ta
tan-awa, bisan asang suok
igmat akong mga mata
matag babayeng sama nimo’g buhok
o sama nimo’g bayhon
ako makahunahuna dayon
(bisan gatalikod ra sya)
ikaw mao na siya,
siya mao na ikaw
ahh, nabalaka akong naghunahuna
ana ug matinuod ang pagsalimuang
mobudlat seguro akong mata
mamula akong nawong
maluspad akong ngabil
maglisud dayon ko'g ginhawa
aha, basin makuyapan ko, puyra!
simbako, palayo lang unta!
ahh, ako nahasol
akong dughan gidumboldumbol
sa kabalaka, sa kahadlok
kay dili pa ako andam
magsugat ang atong mga dalan
kay basin imo kong paninglan
sa saad nga wa natuman.
sinulat ni www.mikeligalig.comLinkback:
https://tubagbohol.mikeligalig.com/index.php?topic=210.0