Pa, nagsulat ko ug balak karon kay gihandum ko ikaw
Mi-text si Marnie nako nga nalipay ka pag-ayo
nga mopauli ko sa dili madugay ug magkita ta pag-usab.
Ug isulat ko unta sa balak ang imong kalipay
apan mga luha ang miagas ning mga mata.
Kaganiha ra ko naghilak, Pa, naghandum nimo.
Matud ni Abing nga nagsige ka paabot sa akong pagpauli
ug buot kong isulat sa balak ang imong pagpaabot kanako
apan ania, Pa, mga luha ang migawas ning mga mata.
Ug miluhod ko, Pa, nag-ampo sa Ginoo nga makalingkawas
ka sa imong balatian ug lugwayan sa Ginoo imong kinabuhi
apan ang akong mga pag-ampo nahimong mga luha ug sip-on
kay wa ko kahibalo unsay ilitok nga pulong atubangan sa Ginoo -
ug sa akong pagdangoyngoy niining mamingawng kadlawon sa Thailand,
nangita ang akong dughan sa kapahulayan sa kaguol -
ug gisuwat ko sa balak ang akong mga kahangawa kanimo, Pa,
apan mga luha ang migawas sa akong mga mata.
Giihap ko ang mga gutlo nga magkita ta pag-usab, Pa,
aron gakson ko ikaw ug ipabati ko kanimo ang gugma sa anak
ngadto sa amahan, ang amahan nga nagmatuto kanako sukad kaniadto -
ug buot ko isuwat ang akong gugma alang kanimo diha sa mga balak,
apan ania, Pa, mga luha ang miagas sa akong mga mata.
Unsay imong bation, Pa, nga makita mo ako nagsulat
ning maong balak nga nagtulo ang akong mga luha?
Dili ba ikaw man ang nagtudlo nako nga higugmaon ko ang balak?
Ug karon ania, Pa, ang balak nahimong tuboran sa akong kasakit.
Pa, nagsulat ko ug balak karon apan unsay akong masulat?
Unsay tukmang pulong nga akong gamiton aron ihulagway
ang akong gugma ug kamingaw kanimo ug kang Mama?
Walay pulong, Pa, nga makapintal sa akong kasub-anan
apan bisan pa man niining tanan sulatan ko gihapon ang balak, Pa
alang kanimo -
ug bisan dili na nimo kini mabasa
akong sultihan si Mama
nga nagsulat ako ug balak alang kanimo, Pa.
Linkback:
https://tubagbohol.mikeligalig.com/index.php?topic=5547.0