Maajo Pay Prisohan Kay Naa Pay Rehas By Mike Ligalig
(as published by the Bohol Standard)
Hapit na ko usa ka buwan ug libot-libot ug pangita ug usa ka hipno nga apartment nga kapuy-an apan napakyas gihapon ang akong mga paningkamot.
Maingon tang pulonga nga no-permanent-address pa ko – ug kung magkalisud na gyud diri sa Tagbilaran adto ra gihapon sa Anda mosangko ning akong paningpalad sa kinabuhi.
Hinuon makabalik man ko sa gawas sa nasud sa bisan unsang adlaw apan lagi kay ang kahamugaway sa kinabuhi sa gawas dili man makatambal sa kahapdos sa samad ning mahilayo ta sa mga mahal sa kinabuhi, palabihon nalang nato ang kapit-os basta mag-uban tang tanan. Dili ni drama sa radyo ha.
Ug dinhi nagsugod ang akong kalbaryo tungod sa kamahal sa mga apartment sa Tagbilaran. Tiaw mo bay tinunga ang presyo sa binulan nga abangan sa usa ka room sa Tagbilaran (wa pa gyuy lami) kay sa abangan didto sa Bangkok. Kasagaran sa Bangkok ang mga apartment kompleto na sa tanang gamit ug labihang baratoha, higda nalay kulang. Apil na ang way pagkutak nga koneksyon sa Internet.
Apan diri sa Tagbilaran, ang imong maabangan kalabera lang. Gawas nga labihang mahala, wala pa gyod kay kapilian kay wa naman poy lain. Miingon ko nga kalabera lang kay ang ubang kwarto wala man ganiy bisan folding bed nalang nga katikongkongan.
Ug naa poy ubang apartment nga maayo pay prisohan kay naa pay rehas ug bintana nga kalusotan sa preskong hangin. Ug dili ka mogawas sa kwarto sa adlaw, lupig pa nimoy gikopras sa ganggangan. Maayo pa gani ang ganggangan kay naa pay kahungawan sa aso. (Tabang: text me palihug sa 0920-494-0649).
Diha poy akong naadtoan nga apartment sa akong ig-agaw nga maayo pay bartolena kay makahuyatid pa ka. Tan-awa ra gud. Inig lingkod nimo sa inodoro sa kasilyas, mag-abot gud nang imong tuhod sa bongbong. Ambot giunsa paghuna-huna sa mga panday. Ambot giunsa pagkwentaha sa tag-iya sa apartment nga tabla sila ug nagmaldisyon sa ilang mga kasera.
Pero mao lagi, bisan ug pait ang kahimtang, agwantahon nalang. Unta lagi pud bisan ug mahal ang abangan, bastante naman lang kung makapahuway ka nga maghayang. Unsaon man na pagpahuway nga naa poy apartment nga lapad unta ang sulod pero imong mabati kung unsay kalandrakas sa pikas ug pikas nga kwarto. Nga kung naay magkibkib ug kinugay sa tungang gabii, mahitimbakowas ka sa imong pagkahitagpilaw kay tua diay nanglampaso ug gabiing dako. Pastilan. Pagkalami pa handumon sa payag sa daplin sa bukid kay bisan ug lipak lang higdaan, tul-id pa imong hagok.
Lisud man gud ning magtukod ta ug apartment nga paabangan, unya ginansya ra atong huna-hunaon ug dili nato tan-awon kung komportable ba ang kahimtang sa imong isigkatawo. Dili man mahimo nga basta nalang mag-abot nang kaha ug mantika, alegrado na. Ato pong tagaan ug lamas ug hiyas nang pagluto. Ug ingon usab niana ang apartment. Dili basta nalang kay naay matukod nga kwarto, bastante na.
Taas kaayo ning estorya kung ato jung subayon. Bisan asa ta mag-abot ani. Gani pa man, dugay na ni nga suliran sa syudad.
Karon unsaon man nato pagkabig ug mga turista nga mopuyo ug dugay sa Tagbilaran lang, pananglitan, kung kulang ang mga lawak nga kapaabangan. Kanindot unta sa atong lugar sa Tagbilaran ug sa mga kasikbit nga lungsod nga masuroyan, apan kung buot kang magdugay diri sa dakbayan, matiguwang kag dali. Dili man pud mahimo nga kung plano nimo mopuyo ug tulo ka buwan, maghotel ka sa tanang adlaw. Gawas kung milyonaryo ka. Kung dili, magbaklay kang mopauli sa imong gigikanan.
Basin makaingon ka nga jaga-jaga ning akong pagsuwat diri. Gikutlo ni gikan sa personal ug tinuod nga kasinatian ug natagamtaman sa daghan na nakong nahinabi.
Labing luoy kining atong mga estudyante nga gikan sa lungsod kay kasagaran sa mga boarding house ga-overcrowding. Matud pa nila, maajo pay tinapa kay luag pa ug inighuho nimo naa pay sabaw. Kamatuoran? Nakasuway ko ug puyo ug boarding house sa Tagbilaran kaniadto nga siyam mi kabuok sa usa ka gamayng kwarto. Hinuon, nalipay ra man pud tong akong mga boardmates sauna kay inig mata daw nila usa nalang ka dangaw atop na ug dali nalang paglili ang panganod.
Kung naa kay kwarta, kahibalo ka kung unsay nindot nga inegosyo karon panahona? Apartment. Boarding House. Low-cost housing sa Tagbilaran ug mga silingang lungsod.
Daghang kwartahan nga buot mopuyo sa Bohol apan mitalaw nga magdugay dinhi kay hangak kaayo mangita ug hamugaway nga kapuy-an.
Linkback:
https://tubagbohol.mikeligalig.com/index.php?topic=20547.0