sinulat ni Michael Ortega Ligalig
Ang hubag sa tudlo kansang kangongot
nagngoyngoy sa gabii, sa adlaw,
naguylap-uylap ang kasakit,
bisan tuod gamay ra kini nga bahin
sa kinatibuk-ang unod
sa tawo, magpatuyang pagkuyanap ang kahait
sa kahapdos ilawom sa panit
kon dili matudlis ang lumoy nga nagbugdo
diin gitan-ogan ang nana nga buot moawas
gawas sa imong hunahuna:
dili mahimo nga pisliton ang hubag
aron mobudlot ang patayng dugo
kung walay ganghaan kalutsan
sa nag-ilaid nga kahapdos
usa na ka semana nga giantos.
Busa pangita ug talinis nga tumoy,
seguroa nga walay taya nga mipilit,
pananglit sa dagom o kaha arpeler
o nail cutter, aron duslakon ang hubag
nga nagbabag sa imong alimpatakan.
Ayaw paabota ang tubod sa nana
nga mabusdik gikan sa tumoy sa tudlo
kay sama kagahi sa ulo
ang pagmakuli sa kangotngot
nga mopauli sa uwat sa kalimot -
hinuon magpadayon kini pagtulisok
sa imong pag-inusara, magasamok
sa imong kalinaw hangtud mahaw-as
sa lawas ang napan-os nga kagaw,
nga nahimong lab-as pag-usab
tungod kay ang kabaho wala kahungaw...
Get FREE 500GB online storage:
https://www.pcloud.com/welcome-to-pcloud/?discountcode=fDiE7jtC01VPbCIygaM67jZVLinkback:
https://tubagbohol.mikeligalig.com/index.php?topic=90618.0