Kas-a, imo kong gi-pangutana
kung pareho ba ’tang tanan
kung magbahug?
Ako, kung magbahug,
lumson ang kan-on
sa sabaw
bisan pa’g sa kape nga mais ra,
toyo, o di ba kaha edibol
sinagula’g asin.
Pero mas ganahan jud ko’g
tinunoan,
’labina kon halang-halang.
Sa matag hungit
mosurok ang kalami,
ang kahang,
ug ang katam-is,
nga igo-igo ra.
Di ko makapugong
sa akong kaugalingon
ug ang paghungit ko magpadayon.
Kay wa ko ningkaon
aron mabusog.
Ningkaon ko aron matagamtam
sa matag hungit
ang kalami,
ang kahang,
ug ang katam-is,
nga igo-igo ra.
Kon modagayday na ang kainit
mo-una kini og saka sa ahong ulo,
mobuhagay sa tibuok ko’ng lawas
kutob sa tumoy sa ahong mga tudlo ug kumagko
Ug mahimo ko na nga kalimtan ka,
ang kainit sa imong gakus,
kahang sa imong dila,
ug katam-is sa imong halok.
Apan kon wa nay kan-on ug sabaw
una nga mamugnaw ang ahong kasing-kasing,
mosunod ang tibuok ko’ng lawas,
pangitaon na usab
ang kainit, kahang, ug katam-is mo.
Linkback:
https://tubagbohol.mikeligalig.com/index.php?topic=3700.0