PUYRA BUYAG
Ni ERNESTO LARIOSA
GITUKMOD ko sa panahon sa pagpaminaw sa mga komentarista sa radio. Kay lagi umaabot na ang eleksiyon ganahan kong maminaw sa nagdilaab nga mga pulitikanhong isyu nga ilang tukion.
Hapit na usa ka dekada nga wa na ko maka-monitor og radio human sa akong pag-retiro sa National Food Authority (NFA) isip spokesman sud sa 28 ka tuig. Kay anha na ko magyampungad sa akong telebisyon.
Usa na ka buwan nakong paminaw sa mga komentarista. Dali kong nadakop pagbalik sa akong paborito nga sila si Bobby Nalzaro, Cesar Albor, Ruphil Banoc, ug Nanding Celeste nga way pagka bahar.
Apan sa pagpalapad ko sa akong pagpaminaw kaÂdaghan ko mahitiurok ngadto sa pagkalukapa sa akong nadungog nga komentaryo sama niini: “Baga kag nawong, giluklok mong kuwarta sa imong bulsa nga di imo. Maayo kang ipahabhab sa akong mga iro!â€
Duna say ingon niini: “Gipaangkan mo ang imong nars makaduha. Pobre nga mobilangkad tungod sa imong kuwarta. Kaluoy nag-ilo nimo hikap sa imong itlog unya imong gipaangkan. Pastilan, ka wa nimoy batasan, unya modagan sa taas nga puwesto sa lalawigan!â€
In fairness, makamao ra ba ni sila manglitok sa atong pinulongan. Makamaong manulti. Apan, naÂnabwag mga pulong nga nalimisan sa kagaw nga nangapyot sa atong kahanginan. Gutter language!
Gimingaw ko sa kanhiayng ngilngig nga mga komentarista sama nila ni Migs Enriquez nga gianggaag “the conscience on air.†Ang maisog nga David Ompoc, Vic Abangan, Vic Villordon ug Manny Rabacal.
Sila manandok sa kilid, apan sa pinulongan nga pinugngan sa kahugaw. Tapot kanunay sa mga isyu ang ilang pagtuki. Makainsulto man apan gitumong sa performance sa usa ka opisyal.
Ang di ko makalimtan mao si Talyux Bacalso “King of Talk†kansang pinulongan nagmabdos sa kahulogan ug panag-amgid. Satirical kaayo nga molugdang sa pagpatin-aw nga makalingaw.
Nanurok karon daw uhong sa kadaghan ang mga blocktimer tungod kay gisuholan sa mga pulitiko. Kini sila daling matental nga mogamit og gutter language aron mobelib nila ang nagsuhol kanila.
Kinsa may mobalibad og kuwarta kanato? Wa seguro. Apan angayng likayan ang pagbinastos sa kaÂhanginan. Ang komentarista adunay dakong responsibilidad sa kalambuan sa moralidad sa katilingban. Pag-umol sa mga batan-on sa katarong ug pagtahod.
Ang laing ngil-ad mao kon ang komentarista di maghuwat nga hatagan kay mangayo gyud sa usa kandidato bugti sa pagdayeg niini. Ang labawng ngil-ad mao kon ang komentarista mahimong extortionist o blackmailer sa kahanginan.
Gipatik sa mantalaang SuperBalita Cebu Septembre 16, 2015.
Linkback:
https://tubagbohol.mikeligalig.com/index.php?topic=81001.0