(this poem was published in Sun-Star Daily Cebu, but i never had the chance to get hold of the copy)
Inig mingawon ko kanimo
Sud-ungon ko ang kapanganuran
Kay basin kanang samang mga panganod
Mapadpad tungod sa imong nahimutangan
Ug basin makahangad ka
Ug makita mo usab
Ang akong nasud-ong;
Bisan pa man ang mga panganod
Mausab ang ilang porma ug dagway
Apan nahimo gihapon silang
saksi
Sa akong paghanduraw kanimo
Inig mingawon ko kanimo
Gakson ko ang huyohoy
Pahagkan ko sa hangin
Ang akong aping
Basin ang susamang hangin
Mopanaw ngadto sa imong gipuy-an,
O kaha sa imong gitrabahoan
Ug ang huyuhoy moasoy kanimo
mahitungod
Sa akong mga paghandom
Inig mingawon ko kanimo
Bas-on ko sa dagat
Ang akong mga tiil –
Ug ang tubig sa baybayon
Daghan ug agianan
Paingon sa ubang mga dagat sa
kalibotan
Basin ang susamang tubig –
Kon ugaling mahianha ikaw
Sa usa ka baybayon –
Mohumod sa imong lapa-lapa
Ug ang dagat mohagawhaw
Mahitungod kon unsa ka
lawom
Ang kamingaw ko kanimo
written by
www.mikeligalig.comLinkback:
https://tubagbohol.mikeligalig.com/index.php?topic=137.0