MikeLigalig.com

Hikalimti Ako
sinulat ni Mike Ortega Ligalig

Hikalimti ako ug hikalimtan ko usab ikaw
sama sa adlaw nga nahikalimot sa panagway
sa bulak panahon sa ting-ulan diin ang panganod
nagsampong sa pagpanghupaw sa langit

Gidughit ko sa makadaghan ang imong pagtagad
apan daw idlas ka pa sa langgam manatad
nga bisan ang hinog nga biyabas ug bugnay
dili makatarog sa katikig sa imong liog

Hikalimti ako kay dugay ka na nga nahikalimot
sa pagsubang sa akong pagbati. Imong gipaabot
ang pagsalop sa akong pailob - ug ikaw malipay
nga magsud-ong sa nagkaawop ko nga paglaom

...dili diay sayon nga hikalimtan ka sa dayon..

dili gayod sayon...