Hangyo Sa Mga Kabayo ug Alibang-bangsinulat ni m. ortega ligaligGikataw-an mo kadtong mga kabayo
nga nagdagan-dagan sa akong dughan
Gikataw-an mo kadtong mga alibang-bang
nga naglupad-lupad sa akong tiyan
Gitamay mo kadtong kahadlok
nga mituok sa akong tutonlan
Gitamay mo kadtong kaulaw
nga nagtabon sa akong kalibutan
Gibiay-biay mo ang pulong nga tim-os
kay giisip mo nga ako way pulos
Gibiay-biay mo ang pangindahay
sa sama kanako nga naghangad kanimo
Wa ka mahibalo nga gikub-kob
ko ang akong handurawan sa makadaghan,
nangita ug timgas nga mga pulong
nga sarang ikapintal
kabahin niadtong mga kabayo ug alibang-bang
nga wa ko hisabting
naghamok, naghadla kanako
sa higayon nga mopatim-aw
ang idlas mong pahiyom
Wa ka mahibalo kung giunsa ko pagbuntog
ang kahadlok,
kung giunsa ko pagdaug
ang kaulaw
nga nakiggubat sa akong kalag
sa higayong mopatim-aw
ang imong anino
Wa ka mahibalo sa singot nga miagas
sa akong agtang,
sa kagutom nga giantos
niining tiyan
aron mahukad
kadtong nalubong nga mga pulong
sa kinauyukan ning alimpatakan
Dili ko panumbalingon
ang imong pagtamihid
Dili ko isipon
ang imong pagpangyam-id
Dili ko tagdon
ang imong pagtamay
Apan hangyoon ko ikaw
sa makausa ug kataposang higayon:
ayaw lang intawon
kataw-i ang papel-
diin tua didto nahulma
ang tunob
sa mga kabayo
ug alibang-bang…
Linkback:
https://tubagbohol.mikeligalig.com/index.php?topic=8687.0