Gitagik ni Mike Ligalig(for shobel)
Giinom ta ang gininhawa sa isla sa Camiguin
Samtang atong gipalong ang kainit sa atong mga lawas
Nga nasubhan sa inalisngaw sa mga balod
Ug nanglingkod ta ilawom niadtong maong cottage
Namahulay ta gikan sa atong pagpamaklay
Sa puti, hamis nga kabaybayonan sa Anda
Nagtagbo ang atong mga pagbati likod sa mga balod
Ug nakita nato ang duyanan sa atong kalibutan
Ang singot sa adlaw nga midahili sa atong liog
Nahimong busay nga mibuhagay sa atong dughan
Ug atong natilawan ang kaparat sa mga bituon
Nanglingkod usab kita sa timgas nga mga balas
Ug gihikap ang mga panganod nga nanglabay
Ug hapit ta mapaso sa kainit sa atong mga kasingkasing
Mipadayon ta sa paglakaw latas sa mga kabhang
Sa kinhason nga nadugmok sa atong mga lapa-lapa
Giinom ta ang gininhawa sa isla sa Camiguin
Ug nahanaw kadtong kauhaw sa singot sa adlaw
Linkback:
https://tubagbohol.mikeligalig.com/index.php?topic=3102.0