Gahom Sa Pagbatisinulat ni m. ligaligHangyoon ko ang mga balili nga sapnayon
ang tibuok mong lawas samtang nahitagpilaw
ka diha sa batiis sa nagdagaydayng sapa
kansang tubod maoy yamog sa bulak
nga atong gipuy-an ug gihimong gingharian.
Tawgon ko ang mga tamsi aron sila makasaksi
sa hubo mong lawas nga gisapnay sa mga balili.
Paawitan ko ikaw sa mga punay ug limokon,
moharana kanimo ang mga dimudlawon ug tokmo.
Bugawon ko ang mga lamok ug manhak
nga may kahidlaw mopang-it sa imong tikod.
Unya, sugoon ko ang mga manatad ug banog
sa pagkuha ug dahong anahaw,
ug paypayan ka sa mga kusi ug maya,
kon ugaling bation ka ug kainit
inig abot sa naglagiting nga udtong tutok.
Paanhion ko ang mga parak-parak ug buta-buta
aron sila ang mobantay sa mga prutas
nga giandam ko alang kanimo sa imong pagmata.
Ug sa imong pagmata, ayaw tug-ani ang mga langgam
sa akong pangalan kay mobukal ang tubig sa sapa.
Linkback:
https://tubagbohol.mikeligalig.com/index.php?topic=6246.0