MikeLigalig.com

(the incident happened in tagbilaran city. the scene was so morbid that i was compelled to rush to my office and i wrote this poem)                       

giyarok sa ugang kalsada ang mibanaw mong dugo sa dalan b. inting
apan sa dihang milugdang ang imong dugo, midigwa ang kalsada
giluod sa kalang-og sa imong pagtalikod.  hangtod misuka ang kalsada
namoasik ang dugo sa paril sa gallares hospital. nanglagsik ang dugo
subay sa siak sa aspalto ug hangtod ang tanang dugo nabad-ay
sa gagmayng mga bato

kasuka-on gihapon ang gibidling kalsada   

gidungaw sa adlaw ang nagtungok mong dugo.  milingiw ang adlaw
midugok ang daghang langaw, nag-iyahay ug tugdon sa gagmayng lim-aw
sa dugong napan-os.  sama sa adlaw, mikolismaot ang dagway sa mga langaw

kadtong mga estambayng nakasaksi sa imong paglayat sa paril miduyog
sa kasubo sa hoyuhoy sa kaadlawon.  miugbok sila ug tambok nga kandila
gihimo nilang koros ang sinalikwayng lipak sa labat sa atbang – nagtaop
pa sa kawayan ang lansang.  ang tayaong lata sa alaska ilang gitisokan
ug lawos nga bugonbilya nga wa kadimdim sa lad-ang tubig sa tagbilaran
gialirongan nila ug mga bato ang koros ug lata

napalong na ang kandila

matag traysikol drayber sa dakbayan milingi tungod sa paril nga imong
gilatayan, mikisdong ang ilang agtang tungod sa naghay-ad mong dugo
matag tawong naglakaw sa kalsada modalikyat ug sud-ong sa dugo
nagpanlingolingo sila.  nanaguto sila.  nanghupaw sila

nasayran, imong asawa nagdangoyngoy samtang gihinabi sa dyrd
matod pa sa kasayorang napupo, ikaw si alfredo, trabahante didtos dao
lumad sa candijay, daghan pag batang panggaon, pakan-on, mahalon
imong asawa gibatil sa kahangangha, katingala ngano samawan kag tawo
hangtod nagsige kag tago sa kasilyas, hangtod miikyas kas mga nars
midagan, midagan ka, ug unya gidupa mo ang gilapdon sa langit ug yuta

written by www.mikeligalig.com


Linkback: https://tubagbohol.mikeligalig.com/index.php?topic=135.0