Author Topic: Dan-ag  (Read 1632 times)

knightboys

  • STUDENT
  • *
  • Posts: 4
    • View Profile
Dan-ag
« on: March 05, 2009, 01:50:46 PM »


Hapit usa na ka oras kong naghinuktok niining papel nga buot nakong hugaw-hugawan ug bistihan sa akong balaknong mga pulong. Apan bisan usa ka pulong wa gyud mahipatik sa hukas nga papel. Gibati na lang nako ang pagdanguy-ngoy sa akong bolpen nga gilaay sulod sa usa ka oras. Pastilan! Nasinati na usab nako ang writers block.

Akong gibundak akong kaugalingon sa humok nakong higdaanan, ug mipiyong aron sa pagtapok sa mga tulukibon nga mga pulong nga nagutaw-utaw sa akong alimpatakan. Apan wa gyuy milundag nga mga pulong ug nakahukom ko nga wa nay kaugmaon ning akong papel nga buot nakong abunohan ug mga pulong. Gibuka nako akong mga mata ug midan-ag sa akong kalimutaw ang kasilaw sa suga nga daw may mikanaog nga anghel gikan sa langit. Akong giuyon akong mga mata sa dan-ag sa suga ug mipatim-aw sa akong panan-aw ang mangtas nga butiki nga milamoy sa usa ka matang sa mananap. Wa nako panumbalinga ang butiki kay mibaling akong dunggan sa ringtone sa akong cellphone. Akong gikuha ug gipindot ang ok sa pagbasa sa message.

“Xai lingaw diha gwapo?

Gikan sa akong textmate ang mensahe. Gwapa kuno ni siya, tall, brown eyes, taliwtiw daw siya ug ilong, taas ug buhok. Mao na ang deskripsyon nga iyang gihatag nako. Ambot kun tinuod kaha. Nakahukom ko nga akong balusan akong textmate. Ming text ko: “Wa, higda2x ra. u?” ug akong gi send akong mensahe ngadto kaniya. Wa abtig usa ka minuto mingbawos dayon siya:

“iball ta choi, kta ta dpit sa entrance sa goldilocks emall. Saman?”

Nagduha-duha ko sa pagsugot. Unsa pa lang hinuon ang dagway niining bayhana. Maot pa lang hinuon. Gi-ahak na! Apan, gibati man sad ko ug kalaay. Way klase karon kay anibersaryo sa EDSA 1 maong nakahukom ko sa pagbawos; “oK. on the way nako”. Wa na lang ko magpagwapo. Gwapo na man sad ko daan. Nakasakay dayon ko ug sakyanan. Wa man sad daghan nga pasahero karon. Sa dihang niabot nako, mingsud dayon ko sa emall. Misigpat ko sa akong cellphone sa pagtan-aw kun adunay bay text. Aduna tuod. Akong gibasa: “nag white shrt ko, then naka black pants. Nag sunglass.” Gikan sa akong textmate ang text. Nagpanglingi ko kun anaa ba gyuy babaye nga nag white shirt, black pants, ug nag sunglass. Wa nako damha nga anaa ra diay sa akong luyo ang maong babaye nga mao ang akong textmate. Nagpaila-ila ko nga ako ang iyang textmate. Tuod, gwapa ang maong babaye, ug husto ang iyang gihatag nga deskripsiyon kabahin sa iyang pisikal nga aspeto. Bigot sad kaayo ug lawas.

“Leo akong ngalan. Ikaw?” paila-ila nako sa akong kaugalingon.

“Kol me Tiff Leo, Unya asa man ta karon.?”

“Humana ka ug kaon? Mangaon sa ta na.” sugyot nako. Gigutom man sad ko ug huna-huna kabahin sa akong isuwat.

“Sige, adto ta sa 3rd floor na.”

Misakay dayon mi ug elevator hangtud nga miabot mi sa food court. Didto, nag-uylap sa kinabuhi ang kan-anan tungod sa kadaghan sa tawo. Arang-arang kay anaay mipahawa nga customer ug mipuli dayon mi. Ming order ko ug duha ka chicken fillet, duha ka kan-on, salad, duha ka regular nga coke. Hilom kaayo among pagpangaon. Wa sad koy daghan nga sulti. Wa siguro kaagwanta, gibuak ni Tiff ang makabungol nga kahilom namong duha taliwala sa kadaghang tawo sa food court.

“Gwapo man diay ka sah” prangka nga sulti ni Tiff.

Igo ra ko nga mitingsi agig tubag sa iyang gisulti. Anad na akong dunggan ug paminaw nianang matang sa pagdayeg.

“Kaswerte siguro sa babaye nga imong mauyab sah.”

“Nganong nakaingon ka man niana?”

“Gwapo gud ka.” ang walay panuko nga gilitok ni Tiff

“Gwapa man sad gani ka. Mokaon pa ka kay orderan pa tika.?”

“Hala, ayaw na. Busog na ko. Maglakaw-lakaw ta na.” sugyot ni Tiff

Milakaw mi padung sa 2nd floor. Walay klaro ang padulngan. Lain-laing nawong lang ang among masugatan. Wala man sad ko kasugat nga kaila nako. Namatikdan nako nga hulma kaayo ang lawas ni Tiff, igwad kaayo ang sampot, nindot ug pamanit.

“Wala diay kay uyab karon.?” pangutanana nako kang Tiff

“Hellloooo, makig eyeball kaha ko nimo kung anaa pa. Ikaw siguro, basin kit-an ta sa imong uyab dinhi hah.”

“Nah, wa man koy hinigugma oy,” mitingsi ko, “Nangita pa gani ko.”

‘Ayy, atik sad ka dah! Kagwapo nimo. Kalawom ba anang imong mga pulong oy. Mora man kag karaang tawo. Asa man diay ka nag-eskuyla?”

“Anaa ko sa tunghaan sa CNU. Nagkuha ko sa kursong English – Literature.”

“Maayo diay ka mo englis. Hala! Maong wala kay uyab kay b***t ka sah. Bakla man ang kasagaran nga estyudante sa CNU.”

“Bayot gud tawn. b***t diay nang walay uyab. Kung mao na, tomboy sad ka, wa man kaha kay uyab. Asa…”


Gisagkaw dayon ni Tiff ang akong buot nga isulti.

“Ahak man ka oy, kagwapa ra sad nako aron matomboy ko,” milanog ang iyang katawa.

“Bawos ra gani toh, Hain man diay ka nagtungha karon?”

“ Wa naman ko nageskuyla. Gipaundang ko sa akong Nanay.”

“Ngano man? Bulyagon sad siguro kaayo ka.”

“Hahaha…” bahakhak ni Tiff, “you hit da korek ansir.” tubag niya sa English nga bisaya kaayo ang pag pronounce. Buot kong magpabuhagay sa akong katawa, apan akong gipugngan agig pag respeto kang Tiff.

“Mao na diha. Unsa man diay imong gikalingawan karon?”

“Wala ra. Sigeg laag. Ngita ug kalipay. Kasuway na kag sex?”

Nakuratan ko sa iyang pangutana. Akong gitutokan ang iyang mata. Nibawos sad siya ug tutok. Niining tungora, wala namo mabantayi nga anaa nami sa gawas sa mall. Samtang nagpaabot siya sa akong tubag, iyang gigapos ang iyang tuong kamot sa akong walang kamot. Hamis kini ug kamot. Wala na lang ko moreklamo agig respeto na usab kang Tiff.

“Wala pa. Nakasuway na diay ka?”

“O, Kalami niana. b***t man jud siguro ka oy. Wa gud ka katilaw ug sex.”

Nalumos akong kaugalingon sa iyang paghagit sa akong pagkalalaki. Nakatulon ko sa akong kaugalingon nga laway. Buot kong ipadan-ag kaniya ang akong kalagot. Buot nakong buboan siya sa akong mga halok. Ug sa diha-diha, naanod na gyud akong kaugalingon sa akong gibati. Wa na nako mabantayi ang akong mga gipangsulti.

“Gi-ahak na, bisan kayaton pa tika karon.”

“Sige ba, tan-awon nato laki ba jud ka.” mikatawa si Tiff sa bigaon nga pagkatawa.

Ug tuod, among nabatyagan among kaugalingon sud sa usa ka lawak sa baratohon nga lodge. Gibutang ni Tiff ang iyang kamot sa akong abaga ug ang akoa sa iyang hawak. Nagtapot ang among ngabil. Taliwala sa among panagtagay, may mingahas sa pagkuhit sa akong huna-huna: Dili mahimong paundayonan nimo ang imong laraw. Dili mahimong mag-paulipon ka sa imong gibati. Dili mahimong hatagan nimo ug kagawasan ang bul-og sa pagbati nga misanap kanimo ug moputos sa imong pagkatawo.

Ug sa kalit, midan-ag sa akong kalimutaw ang kasilaw ug mikum-ot akong nawong. Apan, kinahanglan nga iuyon-uyon nako akong mga mata sa dan-ag sa silaw, ug di ko magpagapos sa mangtas nga butiki.

Ablihan unta ni Tiff ang butones sa akong polo, apan sa wa pa niya mabuhat ang iyang buot buhaton, ako siyang gitukmod. Migawas dayon ko sa lodge ug mipara dayon ug taxi. Sulod sa taxi, buot kong patyon sa akong mangtas nga mga baruganan. Buot nakong patyon si Florentino Ariza. Buot nakong yatak-yatakan iyang pagkatawo.

Taliwala sa mga nag-utaw-utaw nga mga pulong sa akong alimpatakan, milundag ang gisuwat nga balak ni Dr. Linda Alburo nga “Patay na tuod si Maria Clara.” Patay na.

- Glenn Tek-ing Muñez -


Linkback: https://tubagbohol.mikeligalig.com/index.php?topic=18428.0

unionbank online loan application low interest, credit card, easy and fast approval

Tags: