Buot Kong Moipon Sa Dagatsinulat ni m. ligaligBuot kong moipon sa dagat
aron imo akong languyon
hangtud sa tumoy sa baybayon,
aron imo akong salumon
ug pangitaon ang atong ugma,
aron imo akong tugkaron
ug mahikap ang atong damgo.
Apan gisud-ong ko lang ikaw
nga gidula-dulaan sa mga balod.
Buot usab ako mahimong balod
aron itukmod ko ikaw
ngadto sa lapyahan nga mamingaw,
aron masubay ko ang tanang eskina
sa imong lawas ug panagway,
aron maguyod ko ikaw ngadto
sa kalawran sa atong kasingkasing.
Apan nagpasilong lang ako ning bato,
pang-pang daplin sa dagat diin
ikaw akong gihumdan sa pagsud-ong.
Nabasa ako sa kainit sa adlaw
apan wala ako mosibog
aron sundon ang landong sa bato -
palabihon ko nga mauga
ang tinulo sa nagbukal kong dughan
kay nasayod ako nga dili na madugay
ang paghubas sa dagat.
Linkback:
https://tubagbohol.mikeligalig.com/index.php?topic=4546.0