Ang Mga Li Po Sa Siyudad (circa 1991)
sinulat ni Simeon Dumdum Jr.
Si Li Po nalumos dihang mitunob siya sa linaw
Aron unta mopunit ug tipak sa buwan
Hinuon dili man siya Li Po
Ug kadto lim-aw man lang
Ug ang siyudad naputos sa dalan nga pulos lim-aw
Ug misanay ang mga tawo sama kaniya
Nga kon maglumos man ugaling
Adto na lang sa lim-aw sa serbesa...
Labot pa, nianang gabhiona,
Dihang iyang gisid-ing ang lim-aw,
Puno ang iyang dughan...
Dili sa balak, sa kalagot
Sa ting-uwan nga milungag sa kadalanan
Ug sa iyang kalag,
Ug sa mga lungag nga gipasagdan
Sa panahon
Ug City Hall,
Mao nga iyang gilud-an ang iyang nawong diha sa tubig
Nagtoo nga kini nawong sa mayor.
Linkback:
https://tubagbohol.mikeligalig.com/index.php?topic=12890.0